Ferran Torres zyrtarisht lojtar i PSG-së, sulmuesi lë Barcelonën me statistika mbresëlënëse dhe 50 milionë euro

Transferimi është mbyllur për rreth 50 milionë euro, ndërsa Torres ka firmosur një kontratë që do ta mbajë në Paris deri në vitin 2031. Barcelona konfirmoi gjithashtu zyrtarisht marrëveshjen me PSG-në për largimin e 26-vjeçarit.

Torres po përjeton një verë të veçantë në karrierën e tij. Më 19 korrik, ai shënoi golin vendimtar që i dha Spanjës titullin e dytë botëror, ndërsa vetëm pak javë më vonë ka nisur një kapitull të ri në Francë.

Gjatë Botërorit, sulmuesi ishte treguar i rezervuar kur pyetej për të ardhmen e tij dhe nuk kishte dashur të zbulonte nëse do të rinovonte kontratën, do të qëndronte deri në fund të saj apo do të ndryshonte klub. Në fund, zgjodhi transferimin te PSG.

Barcelona e pranon largimin e Torresit në një moment kur sulmuesi kishte fituar gjithnjë e më shumë rëndësi në skuadër. Sezonin e kaluar, spanjolli arriti t’i merrte shpesh vendin në formacion edhe një legjende të golit si Robert Lewandowski. Ironikisht, pikërisht në verën kur polaku largohet nga Barcelona pas katër sezonesh dhe 120 golash, Torres vendos të largohet gjithashtu.

Në total, Ferran Torres e mbyll aventurën e tij te Barcelona me 207 ndeshje dhe 65 gola. Nën drejtimin e Hansi Flick, ai shënoi 40 gola në dy sezone, 19 në sezonin 2024-25 dhe 21 në sezonin 2025-26.

Megjithatë, roli i tij nuk ishte gjithmonë ai i një sulmuesi qendre. Në pjesën e parë të aventurës së tij në Barcelonë, Torres u aktivizua shpesh si anësor, përpara se të merrte më shumë përgjegjësi në zonën e rreptësisë.

Një nga arsyet që mund ta ketë shtyrë Torresin drejt largimit është konkurrenca për një vend në sulmin e Barcelonës. Me emrin e Julián Álvarez që po përmendej vazhdimisht si objektivi kryesor i klubit katalanas, Torres mund të ketë kuptuar se edhe largimi i Lewandowskit nuk do t’i garantonte rolin kryesor që kërkonte.

Por edhe në PSG konkurrenca nuk do të jetë e lehtë. Në Paris, Torres do të gjejë fituesin aktual të “Topit të Artë”, Ousmane Dembélé, si dhe futbollistë të tjerë të nivelit të lartë si Khvicha Kvaratskhelia dhe Désiré Doué. PSG ka afruar gjithashtu Maghnes Akliouche dhe Mika Godts, duke e bërë repartin ofensiv edhe më të pasur me alternativa.

Megjithatë, Torres tashmë është pjesë e projektit të kampionëve të Evropës dhe do të punojë nën drejtimin e Luis Enrique, trajner me të cilin është njohur gjatë kohës së tij te kombëtarja spanjolle.

Pas katër viteve e gjysmë në Barcelonë, Ferran Torres i jep fund aventurës në Spanjë dhe nis zyrtarisht një kapitull të ri në Paris. PSG është tashmë shtëpia e tij e re.

Top Channel