Britania përgatitet për valën e pestë të të nxehtit, temperaturat pritet të arrijnë 36°C

Sipas parashikimeve meteorologjike, temperaturat do të rriten gradualisht gjatë fundjavës, ndërsa kulmi pritet të regjistrohet të mërkurën dhe të enjten, veçanërisht në Anglinë Lindore dhe Juglindore.

Alarmet shëndetësore për temperaturat e larta janë në fuqi në pjesën më të madhe të Anglisë nga mëngjesi i së shtunës deri të martën në mbrëmje. Autoritetet paralajmërojnë për ndikime të mundshme në shërbimet shëndetësore dhe të kujdesit social.

Kjo do të ishte vala e pestë e të nxehtit që prek Britaninë këtë vit. Vendi ka përjetuar tashmë periudha të zgjatura me temperatura të larta, ndërsa dy valë të nxehti gjatë muajve maj dhe qershor janë lidhur me më shumë se 2,700 vdekje të tepërta.

Deri tani këtë vit janë regjistruar 33 ditë kur temperaturat kanë kaluar 30°C në të paktën një zonë të Mbretërisë së Bashkuar. Rekordi prej 34 ditësh, i vendosur në vitin 1995, pritet të thyhet javën e ardhshme.

Ndërkohë, nxehtësia po shoqërohet me një situatë gjithnjë e më shqetësuese të thatësirës. Korriku ishte muaji më i thatë i regjistruar ndonjëherë në Angli dhe Uells që prej nisjes së matjeve në vitin 1836.

Agjencia e Mjedisit ka paralajmëruar se disa zona mund të hyjnë në kushtet e thatësirës gjatë javës së ardhshme. Niveli i ujit në rezervuarët e Anglisë ka rënë në 69%, rreth 12% nën mesataren afatgjatë për këtë periudhë të vitit.

Kushtet e thata dhe temperaturat e larta kanë rritur gjithashtu rrezikun për zjarre në pyje. Sipas Indeksit të Ashpërsisë së Zjarrit, të dielën rreziku mund të arrijë nivelin më të lartë, “jashtëzakonisht i rëndë”, në pjesën më të madhe të Anglisë Lindore dhe Juglindore.

Autoritetet britanike po monitorojnë situatën, ndërsa sinoptikanët paralajmërojnë se temperaturat e larta dhe mungesa e reshjeve mund të zgjasin edhe gjatë ditëve në vijim.

Top Channel