Ekonomi Të Fundit

Tregtia udhëheq kreditimin, rritet kërkesa nga ndërtimi, ndërsa akomodimi frenon huamarrjen

07/08/2026 12:12

Teksa vera sjell më shumë lëvizje në ekonomi dhe bizneset përgatiten për muajt më intensivë të vitit, bankat po financojnë gjithnjë e më shumë sektorët që kanë nevojë për investime dhe kapital qarkullues.

Sipas Bankës së Shqipërisë kredia e re për bizneset arriti në 30.4 miliardë lekë në muajin maj, 18.5% më shumë se një vit më parë. Kompanitë po investojnë, po zgjerojnë aktivitetin dhe po mbështeten te bankat për të financuar planet e tyre.

Peshën kryesore e mban tregtia me shumicë dhe pakicë. Me rritjen e konsumit dhe fluksit të turistëve ky sektor tërhoqi 12.9 miliardë lekë kredi, rreth 19% më shumë se një vit më parë.

Edhe industria përpunuese vijon të kërkojë financim për të rritur prodhimin dhe për të përballuar kërkesën e sezonit. Në gjashtëmujorin e parë kreditimi arriti në 3.6 miliardë lekë, me një rritje prej 5.9%.

Ndërkohë transporti dhe magazinimi shënuan rritjen më të fortë me kredi mbi 7 herë më të larta se një vit më parë, një tregues i shtimit të lëvizjes së mallrave dhe aktivitetit ekonomik. Edhe ndërtimi ka zgjeruar huamarrjen me 61%, ndërsa energjia vijon të financojë investime të reja.

Nga ana tjetër bie në sy tërheqja e sektorit të akomodimit dhe shërbimit ushqimor. Edhe pse sezoni turistik është në kulmin e tij kërkesa për kredi u përgjysmua duke zbritur nga 3.7 miliardë lekë në 1.5 miliardë lekë. Kjo mund të tregojë se një pjesë e bizneseve kanë siguruar financimin më herët ose po mbështeten më shumë te të ardhurat e sezonit sesa te kreditë bankare.

Në fund të listës vijojnë të mbeten bujqësia, peshkimi, arsimi dhe shëndetësia. Këta sektorë vazhdojnë të marrin më pak financim çka tregon se bankat ende përqendrojnë huadhënien te aktivitetet me qarkullim më të lartë dhe kthim më të shpejtë të investimit.

KREDITIMI PËR BIZNESET

(Burimi: Banka e Shqipërisë)

Janar 19.4 mld lekë

Shkurt 20.5 mld lekë

Mars 27.2 mld lekë

Prill 25.5 mld lekë

Maj 25.4 mld lekë

Qershor 30.4 mld lekë

TREGTIA ME SHUMICË DHE PAKICË, QERSHOR

(Burimi: Banka e Shqipërisë)

12.9 MLD LEKË

+19%