Një vendim revolucionar dhe krejtësisht i papritur ka tronditur sot futbollin evropian.
Qeveria e futbollit evropian, UEFA, ka vendosur të ndryshojë një nga rregullat më jetëgjatë dhe më të debatuar të kompeticioneve të saj, duke rritur zyrtarisht pragun e pezullimit nga kartonët e verdhë. Nëse deri më sot lojtarët dhe trajnerët jetonin me ankthin e pezullimit pas vetëm tre kartonëve të verdhë të grumbulluar, tani e tutje ky limit rritet në katër kartonë. Ky vendim hyn në fuqi për të gjitha kompeticionet evropiane dhe pritet të ndryshojë rrënjësisht menaxhimin e ndeshjeve.
Sipas vendimit më të fundit, pezullimi automatik me një ndeshje nuk do të aplikohet më pas kartonit të tretë të verdhë, siç ka ndodhur historikisht në arenën evropiane. Lojtarët do të pezullohen vetëm pasi të plotësojnë numrin prej katër kartonëve të verdhë, duke u dhënë kështu mundësinë të luajnë më lirshëm dhe pa trysninë e ndëshkimit të shpejtë.
Me formatin e ri të Champions League, Europa League dhe Conference League, ku numri i ndeshjeve është rritur ndjeshëm, UEFA ka vendosur t’u japë një frymëmarrje të re skuadrave. Rritja e pragut të pezullimit do të thotë më pak yje të munguar në duelet me eliminim direkt dhe në ndeshjet vendimtare të sezonit.
Ky ndryshim është pritur me brohoritje nga klubet e mëdha evropiane, të cilat prej vitesh kërkonin që limiti i pezullimeve të përshtatej me kalendarin gjithnjë e më të ngjeshur të futbollit modern. Trajnerët nuk do të jenë më të detyruar të bëjnë llogari matematikore për të ruajtur titullarët, ndërsa spektakli në fushë pritet të rritet pasi futbollistët nuk do të luajnë më me “frena dore” nga frika e një kartoni fatal.
Top Channel
