Është zyrtare: Brookfield, një nga fondet më të mëdha të investimeve në botë, ka përfunduar blerjen e 100% të Oaktree Capital Management, fondit amerikan që prej vitit 2024 është pronari i Interit.
Marrëveshja kap vlerën e rreth 3 miliardë dollarëve, pasi Brookfield bleu edhe 26% të aksioneve të mbetura të Oaktree. Më parë, fondi kanadez zotëronte 74% të kompanisë amerikane. Vlera totale e Oaktree është rreth 10 miliardë dollarë.
Por çfarë do të thotë kjo për Interin?
Për klubin zikaltër, nuk pritet të ketë ndryshime të menjëhershme. Struktura e kontrollit mbetet e njëjtë: Oaktree vazhdon të jetë subjekti që merr vendimet për Interin, ndërsa Brookfield bëhet pronari i saj. Pra, edhe pse Oaktree tani është pjesë e një grupi shumë më të madh financiar, administrimi i klubit mbetet në duart e drejtuesve aktualë të fondit amerikan.
Brookfield është një gjigant botëror që menaxhon rreth 1 mijë miliardë dollarë asete, ndërsa Oaktree administron rreth 225 miliardë dollarë. Bashkimi i tyre krijon një fuqi të madhe në tregun financiar ndërkombëtar. Në dokumentet e fundit për projektin e stadiumit të ri San Siro, kontrolli i Interit vazhdon të figurojë te Oaktree Capital Management, që vepron si menaxhues i investimeve.
Kjo do të thotë se pas Interit qëndrojnë investitorë të mëdhenj institucionalë, si fonde sovrane, fonde pensioni dhe investitorë profesionistë, por vendimet strategjike merren nga drejtuesit e Oaktree. Në krye të Oaktree do të vazhdojnë të jenë figurat kryesore të saj, Howard Marks dhe Bruce Karsh, të cilët do të kenë gjithashtu role drejtuese në strukturën e re me Brookfield.
Për tifozët zikaltër, mesazhi kryesor është ky: Interi nuk ndryshon pronar sot, por bëhet pjesë e një fuqie financiare edhe më të madhe. Qëllimi i kësaj lëvizjeje është forcimi i investimeve dhe zgjerimi global i biznesit, ndërsa për klubin pritet të jetë një garanci më shumë për stabilitet financiar dhe projekte afatgjata.
Top Channel
