Mykhailo Mudryk është i lirë të rikthehet në futboll pas një periudhe gati dyvjeçare jashtë fushave për shkak të çështjes së dopingut.
Sulmuesi anësor i Chelsea-t kishte marrë një pezullim katërvjeçar pasi në një mostër të dhënë gjatë grumbullimit me Ukrainën u zbulua meldonium, një substancë e ndaluar nga rregullat antidoping.
Megjithatë, pas apelimit të tij, dënimi është ndryshuar dhe 25-vjeçari tashmë mund të luajë përsëri menjëherë për klubin londinez.
Mudryk pritet t’i bashkohet skuadrës së trajnerit Xabi Alonso në turneun përgatitor në Hong Kong javën e ardhshme, ndërsa rikthimi i tij në fushë shihet si një lajm i rëndësishëm për Chelsea-n.
Në një deklaratë pas vendimit, Mudryk tha se kjo periudhë ka qenë sfida më e madhe që ka përjetuar si futbollist.
“Pas një beteje të gjatë, ndalimi katërvjeçar që më ishte vendosur është anuluar dhe jam i lirë të rikthehem në karrierë me efekt të menjëhershëm”, u shpreh ukrainasi.
Ai gjithmonë ka insistuar se nuk ka përdorur me vetëdije apo qëllim substanca të ndaluara.
“Asnjëherë nuk kam marrë qëllimisht apo me vetëdije ndonjë substancë të ndaluar. Angazhimi im për të konkurruar në mënyrë të ndershme dhe për të përfaqësuar klubin dhe vendin tim me profesionalizëm ka qenë gjithmonë i rëndësishëm për mua”, tha Mudryk.
Sipas Federatës Angleze të Futbollit (FA), çështja u zgjidh pas një marrëveshjeje me Agjencinë Botërore Antidoping (WADA) dhe pas ndryshimeve në procedurat e testimit.
FA bëri të ditur se nivelet e meldoniumit të gjetura në mostrën e Mudryk ishin të ulëta dhe se, nëse mostra do të testohej sot sipas metodave të reja, ajo nuk do të konsiderohej shkelje antidopingu.
Gjatë periudhës së pezullimit, Mudryk është stërvitur individualisht për të ruajtur formën fizike, ndërsa gjithmonë ka deklaruar se nuk e ka ditur burimin e kontaminimit.
Chelsea reagoi duke shprehur kënaqësinë që procesi ka përfunduar dhe se lojtari mund të rikthehet në skuadër.
Klubi londinez deklaroi se e ka mbështetur Mudryk gjatë gjithë kësaj periudhe, duke respektuar njëkohësisht procesin antidoping.
Mudryk iu bashkua Chelsea-t nga Shakhtar Donetsk në janar të vitit 2023 për një shumë që mund të arrinte rreth 88 milionë euro dhe ka regjistruar 10 gola në 73 paraqitje me fanellën e bluve.
Ndeshja e tij e fundit për Chelsea ishte ndaj Arsenalit në nëntor 2024, përpara se të niste periudha e gjatë e pezullimit. Tashmë, ukrainasi do të kërkojë të rifillojë karrierën dhe të bindë stafin teknik se mund të luajë sërish një rol të rëndësishëm në Stamford Bridge.
Top Channel
