Kaos në Itali, e shpallën të vdekur, Milani detyrohet të sqarojë të vërtetën për Franco Baresin

Ikona kuqezi, e cila në gusht të vitit të kaluar iu nënshtrua një operacioni për heqjen e një noduli në mushkëri, po kalon një periudhë shumë të vështirë shëndetësore.

Gjatë orëve të fundit, në rrjet dhe në disa media online u përhap me shpejtësi lajmi i rremë se Baresi kishte ndërruar jetë. Dezinformimi ishte aq i madh, saqë edhe ish-shokë të tij, mes tyre Filippo Galli, si dhe zëvendëskryeministri italian Matteo Salvini, publikuan mesazhe ngushëllimi në rrjetet sociale, duke besuar se lajmi ishte i vërtetë.

Përballë këtij kaosi, Milani u detyrua të ndërhyjë me një reagim zyrtar në rrjetin X, duke përgënjeshtruar kategorikisht zërat për vdekjen e ish-kapitenit legjendar. “AC Milan përgënjeshtron lajmet e rreme që kanë qarkulluar këto minuta për Franco Baresin. Franco po përballet me një moment delikat dhe klubi është pranë tij me shumë dashuri, ashtu si edhe pranë familjes së tij. Ftojmë të gjithë të respektojnë privatësinë e tij dhe të mos kontribuojnë në përhapjen e informacioneve të pabazuara”, thuhet në deklaratën e klubit.

Pas reagimit të Milanit, postimet dhe mesazhet e ngushëllimit u fshinë, por shqetësimi për gjendjen e 66-vjeçarit mbetet i madh.

Vetëm pak muaj më parë, pas operacionit, Baresi kishte dhënë shpresë me një mesazh të shkurtër në rrjetet sociale: “Rroftë jeta”. Në dhjetor ai u rikthye edhe në tribunën e “San Siros”, ku u prit me një ovacion të gjatë nga tifozët kuqezi. Tashmë e gjithë bota e futbollit shpreson që një nga mbrojtësit më të mëdhenj në histori të fitojë edhe këtë betejë të vështirë.

Top Channel