11 të vrarë në sulmet izraelite në Gaza, mes viktimave një çift dhe tre fëmijët e tyre

Sipas Agjencisë së Mbrojtjes Civile në Gaza, pesë anëtarët e së njëjtës familje humbën jetën pasi një apartament në pjesën veriperëndimore të Qytetit të Gazës u godit nga një bombardim. I vetmi i mbijetuar i familjes është një fëmijë, i cili nuk ndodhej në banesë në momentin e sulmit.

Spitali Shifa konfirmoi se ka pranuar trupat e pesë viktimave. Nga ana tjetër, një zëdhënës i ushtrisë izraelite deklaroi se objektivi i sulmit ishte një “terrorist i Hamasit”, ndërsa shtoi se rezultatet e operacionit janë ende në vlerësim.

Pamjet nga vendngjarja tregojnë një pjesë të madhe të fasadës së ndërtesës të shkatërruar, ndërsa ekipet e shpëtimit dhe banorët kërkojnë të mbijetuar mes rrënojave.

Në një tjetër sulm izraelit në lagjen Zaitoun të Gazës, tre persona u vranë pasi u godit një grup civilësh, ndërsa spitali Shifa konfirmoi numrin e viktimave.

Më vonë gjatë ditës, Mbrojtja Civile njoftoi edhe vdekjen e një gruaje, pasi zjarri i artilerisë izraelite goditi një tendë ku ishin strehuar persona të zhvendosur. Disa persona të tjerë mbetën të plagosur, ndërsa tre rezultojnë ende të zhdukur.

Zyrtarët shëndetësorë raportuan gjithashtu edhe dy viktima të tjera në sulme të veçanta izraelite në enklavën palestineze.

Ushtria izraelite nuk ka komentuar mbi këto sulme të fundit, ndërsa Izraeli dhe Hamasi vijojnë të akuzojnë njëri-tjetrin për shkelje të armëpushimit pothuajse çdo ditë.

Sipas Ministrisë së Shëndetësisë në Gaza, që nga hyrja në fuqi e armëpushimit më 10 tetor 2025, të paktën 1,144 palestinezë kanë humbur jetën. Ndërkohë, autoritetet izraelite raportojnë gjashtë viktima gjatë së njëjtës periudhë, mes tyre pesë ushtarë dhe një kontraktor i Ministrisë së Mbrojtjes.

Pavarësisht marrëveshjes për armëpushim, situata në Rripin e Gazës mbetet e tensionuar, me sulme të vazhdueshme dhe viktima nga të dyja palët.

Top Channel