Alarm në Gjirin e Adenit/ Gjashtë motoskafë ‘kërcënojnë’ cisternën e naftës, ekipi i sigurisë qëllon për vetëmbrojtje

Sipas një përditësimi nga Operacionet e Tregtisë Detare të Mbretërisë së Bashkuar (UKMTO), kapiteni i një anijeje cisternë raportoi se gjashtë motoskafë iu afruan në mënyrë të dyshimtë gjatë tranzitit në Gjirin e Adenit.

Raportohet se një prej motoskafëve iu afrua deri në 900 metra në anën e djathtë të cisternës. Në përgjigje, ekipi i armatosur i sigurisë në bord (AST) qëlloi me të shtëna paralajmëruese, duke detyruar mjetin të tërhiqej. Pesë motoskafët e tjerë qëndruan në një distancë prej rreth një milje detare, pa pasur përshkallëzim të mëtejshëm të situatës.

Autoritetet përkatëse kanë nisur hetimet për incidentin, ndërsa deri më tani nuk janë raportuar të lënduar apo dëme materiale në anije.

Kompania EOS Marine e ka cilësuar raportin si shumë të besueshëm dhe u ka bërë thirrje të gjitha anijeve tregtare që operojnë në zonë të ruajnë nivel të lartë gatishmërie.

Mes rekomandimeve për kapitenët janë mbikëqyrja e vazhdueshme vizuale dhe elektronike, raportimi i menjëhershëm i çdo aktiviteti të dyshimtë te autoritetet rajonale, si dhe gatishmëria e plotë e ekipeve të armatosura të sigurisë në bord.

Incidenti ndodh në një periudhë tensionesh të shtuara gjeopolitike në Lindjen e Mesme, ndërsa kompanitë e transportit detar vijojnë të monitorojnë nga afër zhvillimet që mund të ndikojnë në sigurinë e lundrimit.

Megjithëse në Gjirin e Adenit lundrojnë shpesh mjete të vogla peshkimi dhe anije të tjera lokale, autoritetet theksojnë se çdo afrim i dyshimtë duhet të trajtohet me kujdes maksimal, pasi dallimi mes aktivitetit normal detar dhe një kërcënimi të mundshëm nuk është gjithmonë i qartë.

Top Channel