Kanye West “pushton” Tiranën/ Turistë nga shumë vende për koncertin ndërkombëtar, u rritën kërkesat për qira  

“Ka 30 mijë vende në këmbë, 30 mijë ulur dhe do të ketë një sinjalistikë që tregon nga duhet të hysh. Duhet të kemi edhe ndihmën e pjesëmarrësve, të vijnë më herët për ta bërë më të thjeshtë procesin, duke marrë parasysh që presim për herë të parë një aktivitet të përmasave të tilla”, shprehet Gerhard Veizi, këshilltar i eventeve në MTKS.

Mijëra të huaj që do të mbushin shkallët e këtij stadiumi, kanë mbushur rrugët e Tiranës, që shprehen të entuzizmuar për të parë live perfomancën e një prej këngëtarëve më të njohur të muzikës moderne.

“Erdhëm këtu për koncertin e Kanye West”, u shpreh një turiste e huaj.

“Dhe përveç kësaj, duam të eksplorojmë qytetin. Më pëlqejnë performancat e tij, më pëlqen si repon”, tha miku I saj.

“Mendoj se ai është shumë krijues në mënyrën se si flet, në mënyrën se si sillet. Muzika e tij është vërtet prekëse”, u shpreh një tjetër turist i huaj.

Kjo ngjarje artistike që e vendos Shqipërinë në hartën e eventevë të mëdha ndërkombëtare pritet të ndikojë në ekonominë e vendit, ndërsa ekspertët flasin për një rritje të kërkesën për akomodim gjatë këtyre ditëve në Tiranë.

“Ka shumë turistë, ka më shumë kërkesa për qiratë afatshkurtra. Këtë e kemi vënë re në çdo aktivitet që bëhet në Tiranë, shtohet fluksi i turistëve për qiratë ditore. Mendoj se aktivitet të tilla që thithin turistë është pozitive, madje bëhen potencial për të bërë blerje apartamentesh”, deklaron Ervin Demirxhiu, agjent imobiliar.

Një koncert i përmasave të tilla është një mundësi promovimi në arenën ndërkombëtare, një sfidë për vendin tonë që aktivitete të tilla t’i shfrytëzojë për zhvillimin kulturor dhe ekonomik.

Top Channel