Kimi Antonelli regjistroi një fitore mbresëlënëse në garën Sprint të Çmimit të Madh të Britanisë, pasi parakaloi Lewis Hamiltonin në xhiron e nëntë në pistën Hangar Straight dhe e ruajti kryesimin deri në fund të garës me 17 xhiro.
Hamilton, i cili ishte nisur nga pole position, u detyrua të kënaqej me vendin e dytë në podium, ndërsa Antonelli, përveç triumfit të parë në një garë Sprint, vendosi edhe xhiron më të shpejtë të garës. Parakalimi vendimtar u favorizua nga përdorimi efikas i rikuperimit të energjisë në një zonë të pistës ku manovra të tilla kanë qenë historikisht të rralla.
Lando Norris e mbylli garën në vendin e tretë, duke mbrojtur me sukses podiumin ndaj sulmeve të George Russell, i cili përfundoi i katërti. Charles Leclerc, pas një nisjeje jo të mirë, u rendit i pesti, përpara Max Verstappen dhe Oscar Piastri.
Pikën e fundit të Sprintit e siguroi Liam Lawson me Racing Bulls, ndërsa Isack Hadjar dhe debutuesi Arvid Lindblad plotësuan dhjetëshen e parë. Jashtë zonës së pikëve mbetën pilotët e Alpine, Pierre Gasly dhe Franco Colapinto, të renditur respektivisht në vendin e 11-të dhe të 12-të.
Me këtë sukses, Antonelli forcon pozitat në krye të renditjes së Kampionatit Botëror. Piloti italian kryeson me 179 pikë, duke lënë pas George Russell me 136 pikë dhe Lewis Hamilton me 132 pikë.
Top Channel
