Pesë gabimet fatale që sollën atentatin ndaj Trump dy vite më parë, si dështoi Shërbimi Sekret ta ndalonte sulmin

Gjetjet e reja konfirmojnë përfundimet e hetimeve të mëparshme mbi sulmin e ndodhur më 13 korrik 2024 në Butler, Pensilvani, kur Trump u plagos në vesh gjatë një tubimi elektoral. Në atë incident humbi jetën një spektator, ndërsa autori i sulmit u neutralizua nga snajperët e policisë.

Sipas raportit, autori i atentatit, Thomas Matthew Crooks, ishte parë në çatinë e një ndërtese me armë në dorë rreth dy minuta para se të hapte zjarr. Megjithatë, ekipi i sigurisë që mbronte Trump nuk u njoftua në kohë për rrezikun.

Nga ana e tij, Shërbimi Sekret deklaroi se pas ngjarjes ka ndërmarrë një sërë masash për të korrigjuar shumicën e mangësive të evidentuara nga Inspektori i Përgjithshëm i Departamentit të Sigurisë Kombëtare.

Raporti më i fundit zbulon se agjencia dështoi të identifikonte një dron që autori përdori për të monitoruar zonën e tubimit, për shkak të trajnimit të pamjaftueshëm të operatorit dhe problemeve teknike. Po ashtu, agjentët pranë Trump nuk u paralajmëruan se Crooks ishte i armatosur me një pushkë dhe ndodhej mbi çatinë e një ndërtese, pasi mungonte një qendër e përbashkët komunikimi me autoritetet lokale.

Auditimi evidenton gjithashtu se zona jashtë perimetrit të aktivitetit nuk ishte siguruar siç duhej, megjithëse Policia Shtetërore e Pensilvanisë kishte sinjalizuar më herët se ajo mbetej e pambuluar. Sipas raportit, nuk u përdorën as të gjitha mjetet në dispozicion për të penguar vijën e shikimit mes sulmuesit dhe Trump.

“Mungesa e politikave dhe procedurave të qarta, ndarja e kufizuar e informacionit, si dhe bashkëpunimi i dobët me autoritetet shtetërore dhe lokale krijuan kushtet që atentati të mos parandalohej”, thuhet në raport.

Një raport i dytë zbulon gjithashtu se Shërbimi Sekret po përballej me mungesë të konsiderueshme personeli. Gjatë viteve fiskale 2023 dhe 2024, vendet vakante arritën mesatarisht në 21.4%, duke detyruar agjencinë të mbështetej në orë të shumta shtesë dhe ndihmën e agjencive të tjera të zbatimit të ligjit.

Sipas të dhënave, agjentët punuan rreth 1.2 milion orë jashtë orarit, çka solli lodhje të stafit dhe rritje të largimeve nga puna.

Në reagimin e saj, agjencia deklaroi se sot është “më e fortë dhe më e aftë sesa ishte në vitin 2024”, falë reformave institucionale, investimeve në teknologji dhe përmirësimit të proceseve të rekrutimit. Sipas Shërbimit Sekret, koha mesatare për punësimin e një agjenti special është 326 ditë, ndërsa për një oficer policie 256 ditë, pas thjeshtimit të procedurave burokratike.

Top Channel