Banorë të qytetit bregdetar u mblodhën pasditen e sotme për të protestuar në heshtje, para Bashkisë së Durrësit, kundër vendosjes së parkimit me pagesë në rrugët e qytetit, pas thirrjes së bërë në rrjetet sociale.
Protestuesit kundërshtojnë zbatimin e sistemit të parkimit me pagesë në zonat A dhe B, ku Bashkia pritet të nisë së shpejti aplikimin e tarifave. Në qytet këtë muaj ka nisur vijëzimi me blu i rrugëve kryesore të qytetit.
Sipas tyre, kjo masë nuk do të zgjidhë problemin e mungesës së vendeve të parkimit në Durrës, por do të rëndojë edhe më shumë buxhetin e qytetarëve, duke rritur kostot e përditshme të jetesës.
Banorët argumentojnë se qyteti vazhdon të vuajë nga mungesa e hapësirave publike për parkim dhe nga një transport urban i pamjaftueshëm, ndaj vendosja e tarifave, pa u krijuar më parë alternativa dhe infrastruktura e nevojshme, nuk përbën zgjidhje, por vetëm një barrë të re financiare për qytetarët.
Vendimi i Bashkisë miratuar 2 vjet më parë në Këshillin Bashkiak përcakton tarifën 100 lekë/orë në rrugët e sheshet publike të zonës A dhe 40 lekë/orë në zonën B.
Top Channel
