Dy humbjet radhazi të Shqipërisë në stadiumin “Air Albania” kanë sjellë jo vetëm zhgënjim te tifozët, por edhe një statistikë negative që nuk ishte regjistruar prej dekadash në historinë e Kombëtares.
Trajneri Rolando Maran është bërë tekniku me nisjen më të dobët në drejtimin e kuqezinjve gjatë periudhës që Armand Duka drejton Federatën Shqiptare të Futbollit. Për herë të parë në këtë epokë, një trajner i emëruar nga presidenti i FSHF-së e nis aventurën me dy humbje në dy ndeshjet e para në stol.
Rezultatet negative ndaj Izraelit dhe Luksemburgut kanë vendosur menjëherë italianin në një pozicion të vështirë, sidomos duke pasur parasysh se të dyja sfidat u luajtën në Tiranë dhe përballë kundërshtarëve që renditen më poshtë se Shqipëria në klasifikimin botëror të FIFA-s.
Për të gjetur një rast të ngjashëm duhet të kthehemi gati tri dekada pas në kohë. Në vitin 1997, Astrit Hafizi e nisi aventurën e tij në krye të Kombëtares me dy humbje në ndeshjet e para zyrtare. Asokohe Shqipëria, që zhvillonte takimet si vendase në Granada të Spanjës, u mposht 1-0 nga Ukraina dhe 3-2 nga Gjermania në eliminatoret e Kupës së Botës 1998.
Që nga ajo periudhë, asnjë trajner tjetër nuk kishte regjistruar dy humbje radhazi në debutim me Kombëtaren shqiptare. Rekordi qëndroi i paprekur për 29 vite, derisa u thye nga Maran në sfidat e para në krye të stolit kuqezi.
Megjithatë, trajneri italian ka ende kohë për të përmbysur situatën dhe për të rikthyer besimin te skuadra, ndërsa vëmendja tashmë është përqendruar te ndeshjet e ardhshme zyrtare, ku rezultatet do të kenë peshë shumë më të madhe për objektivat e Kombëtares.
Top Channel
