Pakti SHBA-Iran, Rubio: Ka përparim të rëndësishëm. Teherani: Nuk pranojmë marrëveshje për programin bërthamor 24/05 11:36
Të paktën 24 persona u vranë dhe më shumë se 70 të tjerë u plagosën në një sulm të rëndë vetëvrasës në Pakistan, pasi një sulmues shpërtheu një automjet të mbushur me eksploziv pranë një linje hekurudhore, në momentin kur një tren pasagjerësh po kalonte në qytetin Quetta, në provincën Balochistan.
Sipas autoriteteve lokale, shpërthimi ndodhi pranë një zone ku zakonisht janë të vendosura forcat e sigurisë, duke shkaktuar dëme të mëdha materiale dhe panik të gjerë në zonë. Forca e shpërthimit ishte aq e madhe sa përmbysi dy vagona të trenit, të cilët më pas shpërthyen në flakë.
Dëshmitarë dhe pamje të publikuara në rrjete sociale tregojnë shkatërrime të shumta, përfshirë ndërtesa të dëmtuara dhe më shumë se një duzinë automjetesh të shkatërruara në rrugët përreth vendngjarjes.
Zyrtarë shëndetësorë kanë konfirmuar se dhjetëra të plagosur janë dërguar në spitalet lokale, ku rreth 20 prej tyre ndodhen në gjendje kritike. Autoritetet e sigurisë po vijojnë hetimet për të përcaktuar rrethanat e sakta të sulmit.
Përgjegjësinë për sulmin e ka marrë organizata e ndaluar për Çlirimin e Balochistanit (BLA), e cila pretendon se objektiv ishte një tren që transportonte personel sigurie. Quetta, kryeqyteti i provincës së pasur me naftë dhe minerale Balochistan, është prej vitesh i përfshirë nga një kryengritje me intensitet të ulët, ku forcat e sigurisë dhe civilët janë shpesh objekt sulmesh.
Autoritetet kanë dënuar ashpër sulmin, duke e cilësuar një akt të rëndë terrorizmi dhe kanë shpallur gjendje emergjente në spitalet e qytetit, ndërsa hetimet vazhdojnë.
Top Channel
