Tragjedi në Itali/ Shpërthim në një fabrikë fishekzjarrësh. Humbin jetën nënë e bir, dy të plagosur 08/07 22:55
Skema e ngjyrave
Madhësia e shkrimit
Japonia ka ndërmarrë një nga reformat më të rëndësishme të ligjit familjar në dekada, duke lejuar për herë të parë kujdestarinë e përbashkët të fëmijëve pas divorcit.
Ndryshimi historik në Kodin Civil hyri në fuqi më 1 prill 2026 dhe synon të ndryshojë mënyrën se si trajtohen marrëdhëniet familjare pas ndarjes së çifteve.
Deri tani, Japonia ishte i vetmi vend i G7 që njihte vetëm kujdestarinë e vetme pas divorcit, duke i dhënë vetëm njërit prind të drejta ligjore mbi fëmijët. Në praktikë, kjo shpesh nënkuptonte që prindi tjetër humbiste kontaktin me fëmijët, përveç rasteve kur lejohej nga prindi kujdestar.
Për prindër si John Deng, një banor me origjinë nga Hong Kong që jeton prej më shumë se dy dekadash në Japoni, ndryshimi i ligjit përfaqëson një shpresë të re. Ai thotë se pas ndarjes, ish-partnerja mori fëmijët pa paralajmërim dhe kontaktet e tij me ta janë kufizuar në vetëm disa orë të mbikëqyrura çdo muaj.
“Ndjehem bosh. Mendoj se është e drejta e fëmijëve të flasin me të dy prindërit e tyre”, tha ai.
Sipas të dhënave të Ministrisë japoneze të Shëndetësisë, Punës dhe Mirëqenies, rreth 38.5% e martesave në Japoni përfunduan me divorc në vitin 2024. Në më shumë se 86% të rasteve, kujdestaria iu dha nënave, ndërsa marrëveshjet për kujdestari të përbashkët ishin shumë të rralla.
Avokatja familjare Seiya Saito e cilësoi reformën si një “hap të madh përpara”, duke argumentuar se fokusi duhet të jetë tek interesi më i mirë i fëmijës dhe ruajtja e marrëdhënieve me të dy prindërit.
Megjithatë, ndryshimi ka shkaktuar edhe shqetësime serioze. Organizatat që mbrojnë viktimat e dhunës në familje paralajmërojnë se kujdestaria e përbashkët mund të detyrojë viktimat të mbajnë kontakte me ish-partnerë abuzivë.
Chisato Kitanaka, bashkëdrejtuese e një rrjeti strehimi për gratë në Japoni, tha se ekziston rreziku që viktimat e dhunës në familje të mos arrijnë të shkëputen plotësisht nga partnerët e tyre.
Shqetësime të ngjashme ndan edhe Ryo, një nënë japoneze që pretendon se ka përjetuar vite abuzimi fizik nga ish-bashkëshorti i saj. Ajo druhet se ligji i ri mund ta rikthejë atë në kontakt të detyruar me të.
Megjithatë, ligji përfshin mbrojtje për rastet e dhunës dhe abuzimit. Sipas ekspertëve juridikë, gjykatat familjare mund të vendosin kujdestari të vetme kur provohet se ekziston rrezik për sigurinë fizike ose mendore të fëmijës apo prindit.
Top Channel
