“E di çfarë ndodh kur njerëz si ata vijnë në pushtet”/ Mbappe përplaset me partinë e Le Pen, Jordan Bardella: Kur ai ikën nga PSG, fitohet Championsi 13/05 18:11
Lyon rrezikon seriozisht të përjashtohet nga garat europiane sezonin e ardhshëm, pavarësisht se skuadra franceze është shumë pranë sigurimit të një vendi në Champions League.
Sipas raportimeve të “The Telegraph”, klubi francez po përballet me një hetim të ri nga UEFA për shkak të dyshimeve se nuk ka respektuar kushtet e një marrëveshjeje financiare të arritur verën e kaluar me Organin e Kontrollit Financiar të Klubeve.
Aktualisht, Lyon renditet në vendin e katërt në Ligue 1 dhe vazhdon të luftojë për një vend në Champions League. Një fitore ndaj Lens në fundjavën e fundit të sezonit mund t’i sigurojë skuadrës kualifikimin direkt në kompeticionin më të rëndësishëm europian për klube.
Në rastin më të keq, Lyon ka të garantuar pjesëmarrjen në Europa League ose Conference League, por problemet financiare mund t’i kushtojnë shumë shtrenjtë klubit.
Vitin e kaluar, UEFA e ndëshkoi Lyonin për shkelje të rregullave të qëndrueshmërisë financiare. Klubi madje u dërgua përkohësisht në Ligue 2 për shkak të situatës ekonomike, por më pas arriti ta rrëzonte vendimin pas apelimit.
Për të përmirësuar financat, Lyon u detyrua të shiste disa nga lojtarët kryesorë, mes tyre edhe talentin Rayan Cherki, i cili iu bashkua Manchester City për 34 milionë paund.
Sipas marrëveshjes me UEFA-n, pronarët e klubit duhej të investonin 52 milionë euro në klub deri më 15 korrik të vitit të kaluar dhe t’i konvertonin ato në kapital deri më 15 tetor. Megjithatë, raportimet sugjerojnë se këto kushte mund të mos jenë përmbushur plotësisht.
UEFA zakonisht heziton të përjashtojë klubet nga garat europiane, por nëse Lyon rezulton shumë larg objektivave financiare të vendosura, qeveria europiane e futbollit mund të detyrohet të marrë masa të forta.
Klubi francez po kalon një periudhë shumë të vështirë ekonomike, pasi vetëm në gjysmën e dytë të vitit të kaluar raportoi humbje prej 162 milionë paundësh.
Tashmë, Lyon rrezikon që problemet financiare t’i kushtojnë jo vetëm në aspektin ekonomik, por edhe në pjesëmarrjen në Europë sezonin e ardhshëm.
Top Channel
