Do të jetë Pogradeci skuadra që do të përballet me Teutën në ndeshjen e playoutit të Kategorisë Superiore.
Skuadra liqenore mundi në finalen e playoffit të Kategorisë së Parë, Besën me rezultatin 1-0, një fitore që erdhi vetëm në kohën shtesë pasi 90 minutat e kohës së rregullt u mbyllën me barazimin 0-0.
Sfida nisi më mirë për skuadrën kavajase që krijuan disa raste të mira shënimi me Grecën dhe Chinëendu, por rrjetat mbetën të paprekura. Edhe në pjesën e dytë pati shanse shënimi si nga Pogradeci ashtu edhe Besa, por sërish nuk u shënua asnjë gol dhe kështu 90 minutat e sfidës u mbyllën 0-0 dhe skuadrat iu drejtuan 30 minutave të kohës shtesë.
Në këtë fraksion të ndeshjes, India Oliveira arriti të shënojë për skuadrën liqenore duke i dhënë avantazhin 1-0, ndërkohë që nuk munguan as momentet e nervozizmit në fushën e lojës me arbitrin që u detyrua të nxjerrë kartonin e kuq 3 herë, duke ndëshkuar Neto dhe Kofin për Besën dhe Kazim për Pogradecin. Në fund ndeshja u mbyll 1-0 për Pogradecin që tani do të luajë ndeshjen e playoutit për Kategorinë Superiore me Teutën në 16 maj në orën 16:00 në stadiumin ‘Niko Dovana’ të Durrësit.
Top Channel
