Gjysmëfinalja mes Arsenalit dhe Atlético Madridit në UEFA Champions League pritet të jetë një duel i hapur deri në fund, pas barazimit 1-1 në ndeshjen e parë të zhvilluar në Spanjë.
Me gjithçka ende në ekuilibër, shumë tifozë pyesin: çfarë ndodh nëse edhe ndeshja e kthimit përfundon në barazim?
Sipas rregullores aktuale të Champions League, nuk ekziston më rregulli i golave në transfertë. Kjo do të thotë se golat e shënuar jashtë fushe nuk kanë më peshë të dyfishtë dhe nuk ndikojnë në mënyrë të veçantë në përcaktimin e fituesit.
Nëse ndeshja në Emirates Stadium përfundon 0-0, 1-1, 2-2, 3-3 apo çdo rezultat tjetër i barabartë, asnjëra skuadër nuk do të kualifikohet direkt pas 90 minutave. Në këtë rast, përballja do të shkojë në kohën shtesë, ku do të luhen dy pjesë nga 15 minuta secila.
Nëse baraspesha vazhdon edhe pas 120 minutash, atëherë finalisti do të përcaktohet me goditje penalltish, duke e bërë dramën edhe më të madhe. Sa u përket mundësive të Arsenalit për të kaluar në finale, skenari është i qartë: skuadra londineze duhet të fitojë ndeshjen në kohën e rregullt për t’u kualifikuar menjëherë. Nëse barazon, atëherë duhet të sigurojë fitoren në shtesë ose, në rast se ndeshja shkon deri në fund pa fitues, të triumfojë në penallti.
Fituesi i kësaj përballjeje do të sigurojë një vend në finalen e madhe që do të zhvillohet në Budapest, ku do të përballet me fituesin e çiftit Bayern Munich – Paris Saint-Germain.
Top Channel
