E paprecedentë në Serbi, dalin pamjet e dhunës ndaj atyre që kritikojnë publikisht qeverinë dhe kryeministrin Vuçiç 23/04 12:18
Pasuria e miliarderëve rusë është rritur me 11% gjatë vitit të kaluar, duke arritur në 696.5 miliardë dollarë, pavarësisht luftës në Ukraina dhe sanksioneve të ashpra perëndimore, sipas raportit të publikuar nga Forbes Russia.
Sipas analizës, pjesa më e madhe e kësaj pasurie lidhet me burimet natyrore, të cilat Rusia i eksporton prej dekadash në tregjet globale. Rritja e çmimeve të mallrave, si pasojë e ndërprerjeve tregtare, ka ndikuar drejtpërdrejt në pasurimin e elitës ekonomike, megjithëse lista nuk ka sjellë emra të rinj në krye.
Në vendin e parë renditet Alexei Mordashov, drejtues i kompanisë së investimeve Severgroup, me një pasuri prej 37 miliardë dollarësh, 8.4 miliardë më shumë se një vit më parë.
I dyti në listë është Vladimir Potanin, kreu i Interros dhe kompanisë së metaleve Nornickel, me një pasuri prej 29.7 miliardë dollarësh, ndërsa në vendin e tretë renditet Vagit Alekperov, ish-drejtues i Lukoil, me 29.5 miliardë dollarë.
Në vendin e katërt ndodhet Leonid Mikhelson, CEO i Novatek, së bashku me familjen e tij, me një pasuri prej 28.3 miliardë dollarësh.
Megjithatë, edhe pse pasuritë e miliarderëve rusë janë rritur, ato mbeten dukshëm më të ulëta krahasuar me gjigantët globalë të teknologjisë. Sipas renditjes globale të Forbes, në krye qëndron Elon Musk me një pasuri prej 839 miliardë dollarësh, i ndjekur nga Larry Page me 257 miliardë dollarë.
Raporti nënvizon se, megjithë presionin ndërkombëtar dhe sanksionet, ekonomia e bazuar në burime natyrore vazhdon të mbetet një faktor kyç në rritjen e pasurisë së elitës ruse.
Top Channel
