Skandalet nuk kanë të ndalur për Kylie Jenner, ish-punonjësja ngre akuza të rënda ndaj yllit televiziv

Këtë herë, ish-mirëmbajtësja e shtëpisë, Dinora Carolina Cabria Amaya, pretendon se gjatë punës është kafshuar nga një qen, është ekspozuar aksidentalisht ndaj gazit irritues dhe ka mbetur e bllokuar për më shumë se një orë brenda garderobës së Jenner, ndërsa një mbikëqyrëse tallej me kërkesat e saj për ndihmë.

Sipas dokumenteve gjyqësore të siguruara nga “Page Six”, Amaya paraqiti padinë më 5 nëntor në Gjykatën e Lartë të Los Angelesit, duke akuzuar Kylie Jenner, kompanitë e saj dhe disa anëtarë të stafit për diskriminim për shkak të aftësisë së kufizuar, hakmarrje, pushim të padrejtë nga puna dhe shkelje të shumta të legjislacionit të punës.

Amaya pretendon se kishte nisur të punonte për themeluesen e “Kylie Cosmetics” në mars të vitit 2025, duke marrë 40 dollarë në orë në para në dorë dhe duke punuar zakonisht gjashtë ditë në javë. Megjithatë, sipas saj, nuk paguhej për orët shtesë, detyrohej të punonte me orare të zgjatura dhe të udhëtonte mes pronave të ndryshme të Jenner pa marrë kompensim për kilometrat apo kohën e udhëtimit. Një nga episodet më të rënda të përshkruara në padi lidhet me një incident në garderobën e Kylie Jenner.

Amaya pretendon se mbikëqyrësja e saj, Laura Dooley, e udhëzoi të hynte në garderobë përmes një kodi hyrjeje, por ajo mbeti e bllokuar brenda për më shumë se një orë. Sipas padisë, ish-punonjësja telefonoi e alarmuar mbikëqyrësen dhe iu lut për ndihmë, por kjo e fundit dyshohet se “qeshi dhe u tall” me situatën e saj.

“Askush nuk ndodhet në shtëpi që mund të të nxjerrë dhe unë nuk mund t’ia jap fjalëkalimin dikujt tjetër, kështu që thjesht duhet të presësh”, pretendohet se i tha Dooley.

Amaya deklaron se qëndroi e bllokuar derisa dikush erdhi për ta nxjerrë. Problemet, sipas saj, vazhduan edhe në muajt pasues. Në shtator të vitit 2025, teksa pastronte një sirtar në lavanderi, një bombol gazi irritues, e cila pretendohet se nuk ishte siguruar siç duhej, u aktivizua aksidentalisht dhe lënda përfundoi në sytë dhe fytyrën e saj.

Ish-punonjësja pretendon se pas incidentit vuajti nga “shikim i turbullt, djegie, kruarje, tharje, irritim dhe një ndjesi e vazhdueshme sikur kishte rërë në sy”. Një muaj më vonë, sipas padisë, ajo u kafshua nga një qen teksa pastronte shtëpinë e tij në një prej pronave të Jenner.

Amaya pretendon se raportoi dëmtimin, por nuk mori ndihmën e duhur dhe u detyrua të blinte vetë ilaçe pa recetë për trajtimin e plagës. Ajo gjithashtu pretendon se shpesh udhëzohej të largohej nga dhomat ose të qëndronte larg syve, pasi Jenner nuk dëshironte ta shihte.

Ish-punonjësja thotë se u pushua nga puna më 6 shkurt, pak pasi kishte vënë në pikëpyetje faktin se një tjetër mirëmbajtëse përfitonte rimbursim për udhëtimet, ndërsa asaj nuk i paguhej.

Avokatja e Amaya-s, Della Shaker, deklaroi për “Page Six” se çështja ngre pikëpyetje më të gjera mbi mënyrën se si trajtohen punonjësit shtëpiakë nga individë me pasuri të mëdha.

“Ky rast ngre një pyetje më të gjerë: sa punonjës shtëpiakë kanë frikë të raportojnë trajtimin e paligjshëm, sepse besojnë se punëdhënësit e tyre janë tepër të fuqishëm për t’u dalë kundër? E vërteta nuk duhet të varroset kurrë pas pasurisë, frikës apo heshtjes. Askush nuk duhet të ketë frikë të thotë të vërtetën”, deklaroi Shaker.

Nga ana tjetër, përfaqësuesi ligjor i Kylie Jenner, Michael Rhodes, i hodhi poshtë akuzat dhe kritikoi avokaten që përfaqëson ish-punonjëset.

“Këto çështje të fundit po ngrihen nga e njëjta avokate që më parë ka paraqitur pretendime në emër të ish-punonjësve të Kylie-t. Është e qartë se kjo avokate dëshiron të përdorë publicitetin për të përfituar një shumë parash të pajustifikuar. Ne nuk do të frikësohemi për të bërë këtë. Për këtë arsye, do t’i mbrojmë me vendosmëri këto çështje të pabazuara dhe presim me padurim të tregojmë versionin tonë të ngjarjeve”, deklaroi Rhodes.

Padia e Amaya-s është e katërta këtë vit që një ish-punonjëse e familjes ndërmerr veprime ligjore kundër Kylie Jenner ose kompanive të saj. Më 17 prill, ish-mirëmbajtësja Angelica Hernandez Vasquez ngriti padi duke pretenduar se ishte përballur me ngacmime dhe diskriminim për shkak të origjinës salvadoriane, besimit katolik dhe statusit të saj të emigracionit.

Ajo pretendon se kolegët talleshin me theksin e saj, e poshtëronin dhe i caktonin detyrat më të padëshiruara. Sipas saj, ankesat nuk u morën parasysh dhe në një rast një mbikëqyrës i hodhi varëse rrobash në këmbë. Çështja vijon të trajtohet nga gjykata, ndërsa palët kanë zhvilluar seanca ndërmjetësimi në tetor.

Më 29 prill, një tjetër ish-mirëmbajtëse, Juana Delgado Soto, ngriti padi kundër Jenner dhe kompanive të saj, duke pretenduar diskriminim, ngacmim dhe hakmarrje. Soto pretendon se i ndalohej ta shikonte apo t’i buzëqeshte Kylie Jenner dhe se detyrohej të fshihej për orë të tëra në banjë ose në garazh sa herë që ylli televiziv ndodhej në shtëpi. Ajo gjithashtu pretendon se i mohohej qasja në ujë të pijshëm dhe në tualet, si dhe se ishte trajtuar keq pas vdekjes së vëllait të saj.

Ndërkohë, më 22 qershor, një ish-kuzhiniere private, e identifikuar në dokumentet gjyqësore si Jane Doe, paditi Jenner dhe disa anëtarë të stafit të saj për diskriminim për shkak të shtatzënisë dhe pushim të padrejtë nga puna.

Kuzhinierja pretendon se pësoi abort spontan pasi iu kërkua të kryente punë fizikisht të lodhshme, pavarësisht se kishte një shtatzëni me rrezik të lartë. Sipas padisë, ajo u detyrua të punonte me orë të gjata gjatë festimit të ditëlindjes së një familjari në Palm Springs të Kalifornisë. Të nesërmen në mëngjes, ajo u zgjua me gjakderdhje të rëndë dhe në spital mësoi se kishte humbur fëmijën. Ajo akuzon gjithashtu stafin e Jenner për trajtim të keq pas humbjes së shtatzënisë dhe përfundimin e marrëdhënies së punës.

Ekipi ligjor i Kylie Jenner ka kundërshtuar kërkesën e ish-kuzhinieres për të ruajtur anonimitetin dhe ka kërkuar që ajo të zbulojë identitetin e saj. Seanca për këtë çështje është caktuar më 28 janar 2027, ndërsa një tjetër seancë procedurale do të zhvillohet më 25 janar. Të katër gratë përfaqësohen nga e njëjta avokate, Della Shaker, ndërsa disa prej padive përmendin të njëjtat kompani dhe mbikëqyrës si të paditur. Megjithatë, të gjitha pretendimet e ngritura nga ish-punonjëset mbeten akuza dhe ende nuk janë provuar në gjykatë.

Top Channel