Nuk ka fitues në sfidën përmbyllëse të javës së 32 të Kategorisë Superiore mes Partizanit dhe Bylisit, pasi në Arenën e Demave kjo ndeshje u mbyll me barazimin 1-1.
Bylisi e befasoi Partizanin teksa që në minutën e dytë zhbllokoi rezultatin me debutuesin Ferreira duke shfrytëzuar një gabim të Të Kuqve. Por nuk vonoi shumë dhe në minutën e 19, Partizani arriti të barazojë shifrat në 1-1 me Isgandarli me penallti të fituar nga ai vetë, një 11 metërsh që u akordua pasi episodi u verifikua në sistemin VAR. Pjesa e parë u mbyll me barazimin 1-1.
Në pjesën e dytë, Partizani mbeti me 10 futbollistë pasi Ismaili u ndëshkua me karton të kuq sepse preku topin me dorë me dashje. Në fillim arbitri i tregoi kartonin e verdhë futbollistit të Partizanit, më pas e verifikoi episodin në sistemin VAR dhe ngjyra e kartonit u shndërrua në të kuqe. Pas këtij momenti historitë e ndeshjes nuk ndryshuan më me skuadrat që morën nga 1 pikë që nuk i shërben asnjërës pasi Partizani mbetet jashtë zonës Final Four edhe për këtë javë teksa shkon në 45 pikë, ndërsa Bylis është në vendin e parafundit me 32 pikë po aq sa edhe Vora dhe Tirana.
Top Channel
