Natë terrori për lojtarin e Romës, banda e armatosur i merr peng familjen për ta grabitur

6 banditë të maskuar dhe të armatosur me pistoleta thyen portën e vilës ku jeton futbollisti i ri në Via Scevola Mariotti. Ata fillimisht kërcënuan nënën e futbollistit e cila ishte ende zgjuar, më pas ata zgjuan lojtarin e Romës, gruan e tij, vëllain dhe kunatën, dhe i detyruan të gjithë t’i ndiqnin në një dhomë ku i mbajtën nën kërcënimin e armëve.

Banditët plaçkitën shtëpinë, duke vjedhur një orë Rolex me vlerë 6,000 euro dhe disa çanta Louis Vuitton dhe më pas u larguan. Fatmirësisht askush nuk u lëndua. Sapo arriti, policia kreu një kontroll në vilë dhe konstatuan se grabitësit kishin fikur kamerat për të shmangur filmimin, por ata ende nuk e kanë përjashtuar mundësinë e lënies së disa gjurmëve.

Hetimet fillestare zbuluan se grabitësit ishin të organizuar mirë dhe kishin në shënjestër një nga vilat në një kompleks banimi. Nuk është e qartë nëse ata kishin në shënjestër konkretisht futbollistin, i cili është në proces të largimit nga ajo shtëpi.

Sipas policisë banditët morën sende me vlerë që arrin në 10,000 euro. Por frika nga ajo që ai dhe familja e tij përjetuan mbetet prezente.

Banditët u shfaqën pak pas orës 2:00 të mëngjesit dhe alarmi u dha në orën 3:40 të mëngjesit. Grupi hapi rrjetën në dritaren e dhomës së ndenjes dhe më pas, duke përdorur mjete të specializuara, hapi derën prej xhami, për të hyrë në shtëpi.

Familjarët u mbyllën në dhomë, ku u vëzhguan nga disa prej kriminelëve, ndërsa bashkëpunëtorët e tyre plaçkitën shtëpinë.

Top Channel