Gianluca Prestianni, sulmuesi i Benficës, është pezulluar përkohësisht nga UEFA pas akuzave për një koment racist drejtuar Vinicius Jr.
Gjyqtari i ndeshjes, Francois Letexier, ndërhyri menjëherë gjatë takimit të fundit mes Benfica-s dhe Real Madrid në Lisbonë, pasi Vinicius e ngriti një shqetësim mbi fjalët e Prestianni.
Letexier aktivizoi protokollin anti-racizëm të UEFA-s, duke shkaktuar një ndërprerje prej rreth 10 minutash në ndeshje. Pas incidentit, u hap një hetim mbi këtë akuzë, të cilën Prestianni e ka mohuar. Duke pasur parasysh që hetimi është ende në vazhdim, UEFA ka vendosur të vendosë një pezullim të përkohshëm prej një ndeshjeje për Prestianni-n.
Nëse rezulton i fajshëm, ai mund të përballet me një ndalim prej të paktën 10 ndeshjesh. Kjo do të thotë se Prestianni do të mungojë në ndeshjen e kthimit të fazës play-off të Ligës së Kampionëve kundër Real Madrid-it, që do të luhet të mërkurën mbrëma, në Santiago Bernabeu.
Në ndeshjen e parë, Real Madrid fitoi 1-0, me golin e vetëm të ndeshjes të shënuar nga Vinicius Jr, vetëm disa momente përpara se të bëhej komenti i akuzuar racor. Përveç Prestianni, edhe trajneri i Benficës, Jose Mourinho, do të jetë i pezulluar për këtë ndeshje, pasi u dërgua me karton të kuq në Lisbonë.
Pas ngjarjes, Vinicius Junior reagoi në rrjetet sociale, duke i quajtur si “frikacakë racistë” ata që përdorin fjalë të tilla. Në deklaratën e tij ai theksoi: “Racistët, mbi të gjitha, janë frikacakë. Ata duan të fshehin dobësinë e tyre duke përdorur fjalë të tilla, por ata kanë mbrojtjen e atyre që, teorikisht, kanë detyrën për t’i ndëshkuar.”
Në anën tjetër, Prestianni ka mohuar çdo akuzë dhe ka shpërndarë një deklaratë të tijën, ku shkruan: “Dua të sqarohem se në asnjë moment nuk kam drejtuar fyerje raciste ndaj Vinicius Jr, i cili, fatkeqësisht, e ka keqkuptuar atë që ka menduar se ka dëgjuar.”
Top Channel
