Shorti i hedhur sot në sallën ceremoniale në Bruksel ka përcaktuar rrugëtimin e kombëtares Shqiptare në edicionin e ri të UEFA Nations League 2026/27.
Pas rënies në Ligën C, kuqezinjtë kanë mësuar emrat e tre rivalëve që do t’i sfidojnë në Ligën C: Finlandën, Bjellorusinë dhe San Marinon.
Në letër, fati duket se i ka buzëqeshur Shqipërisë, duke i kursyer kundërshtarë si Sllovakia apo Bullgaria, por rruga drejt rikthimit në elitë kërkon përqendrim maksimal, sidomos ndaj “Vizatimeve” finlandeze.
Finlanda, “mace e zezë” historike
Rivali më i fortë i vazos së dytë mbetet Finlanda. Historiku i përballjeve flet në favor të tyre, me kuqezinjtë që kanë arritur vetëm 2 fitore në 7 takime, kundrejt 4 sukseseve të nordikëve. Me një bilanc golash 6-8, Finlanda mbetet pengesa kryesore për vendin e parë, teksa kujtojmë se në ndeshjet tona të fundit zyrtare (kualifikueset e Botërorit 2002), ne nuk arritëm të merrnim asnjë pikë.
Bjellorusia dhe kujtimi i vitit 2020
Me Bjellorusinë, Shqipëria ka një histori krejtësisht të balancuar: 7 ndeshje, 3 fitore për ne, 2 për ata dhe 2 barazime, me një golavarazh perfekt 10-10. Megjithatë, kujtimet më të freskëta janë pozitive. Pikërisht ndaj tyre në vitin 2020, djemtë tanë siguruan ngjitjen në Ligën B pas një fitoreje drithëruese 3-2 në Tiranë dhe një suksesi të pastër 0-2 në transfertë. Bjellorusia mbetet një skuadër fizike, por që Shqipëria e ka treguar se di ta mposhtë.
San Marino, detyrim për pikë maksimale
Nga vazoja e katërt ka ardhur San Marino, kundërshtari “perfekt” për të blinduar 6 pikë në grup. Në 4 përballje historike, Shqipëria ka regjistruar 4 fitore, duke shënuar 13 gola dhe pa pësuar asnjë. Çdo rezultat tjetër përveç fitores në këto dy ndeshje do të konsiderohej një dështim i rëndë për ambiciet e kuqezinjve.
Objektivi është i qartë, vendi i parë në grup. Ky pozicion jo vetëm që na kthen automatikisht në Ligën B, por na hap sërish rrugën për një “biletë sigurie” drejt Play-Off të Europianit 2028.
Ndeshjet do të zhvillohen në një format të ri dhe të ngjeshur. Për herë të parë, UEFA do të aplikojë “dritaren e gjatë”, ku 4 ndeshjet e para do të luhen brenda një blloku midis 24 shtatorit dhe 6 tetorit 2026, ndërsa dy sfidat mbyllëse në nëntor. Ky format kërkon një stol të gjatë dhe përgatitje të lartë fizike, pasi do të luhet çdo tre ditë.
Top Channel
