Iu hakerua telefoni dhe e rrahën sepse u tall me princin e Arabisë Saudite, komediani arab rrëfen vështirësitë pas incidentit: Ia dolën të më heshtnin, nuk jam më… 31/01 22:26
Të paktën 32 persona, përfshirë gra dhe fëmijë, u vranë në sulmet izraelite në Rripin e Gazës të dielën, thanë zyrtarët palestinezë, në dhunën e fundit që vë në provë një armëpushim tashmë të brishtë, me Katarin dhe Egjiptin, ndërmjetësuesit midis Izraelit dhe Hamasit, që dënojnë “shkeljet e përsëritura izraelite” të armëpushimit.
Izraeli tha se kreu sulme ajrore në përgjigje të shkeljeve. Ndërsa njerëz janë vrarë pothuajse çdo ditë në bombardime në enklavën palestineze që kur armëpushimi hyri në fuqi në tetor, sulmet e sotme ishin veçanërisht vdekjeprurëse.
Zjarri izraelit ka vrarë më shumë se 509 persona, shumica e tyre civilë, sipas punonjësve të shëndetësisë në Gaza, që kur një armëpushim i ndërmjetësuar nga SHBA-të midis Hamasit dhe Izraelit hyri në fuqi në tetor pas dy vitesh lufte.
“Numri i të vdekurve që nga agimi është rritur në 32, kryesisht fëmijë dhe gra”, tha Mbrojtja Civile e Gazës në një deklaratë.
Një sulm ajror goditi një apartament në Qytetin e Gazës, duke vrarë tre fëmijë dhe dy gra, sipas një anëtari të familjes dhe agjencisë zyrtare palestineze të lajmeve WAFA. Një tjetër sulm ajror goditi një tendë në Khan Younis, më në jug, sipas WAFA-s.
“I gjetëm tre mbesat e mia të vogla në rrugë, ata thonë armëpushim e gjëra të tilla, çfarë bënë këta fëmijë, çfarë bëmë ne?”, tha Samer al-Atbas, një i afërm i viktimave.
“Apartamente, tenda, strehimore dhe një stacion policie u vunë në shënjestër”, tha zëdhënësi i Hamasit, Mahmoud Bashal. Lëvizja islamiste palestineze i dënoi sulmet, duke i quajtur ato një “krim brutal”.
Në një deklaratë, ushtria izraelite tha se veprimet e saj ishin në hakmarrje për një incident të premten në të cilin tetë militantë palestinezë dolën nga një tunel në Rafah, në Gazën jugore, në atë që ushtria izraelite e quajti një shkelje të armëpushimit.
Egjipti dhe Katari, ndërmjetës midis Izraelit dhe Hamasit, dënuan “shkeljet e përsëritura” të armëpushimit nga Izraeli, duke u bërë thirrje të gjitha palëve të “tregojnë përmbajtje maksimale” përpara hapjes së pikës kufitare të Rafah midis Rripit të Gazës dhe Egjiptit.
Top Channel
