Nis pastrimi në jug të Gazës, Izraeli kamp për palestinezët: Do mbikqyren me teknologji

Gjenerali rezervist i brigadës, Amir Avivi i tha agjencisë së njohur të lajmeve se kampi parashikohet të ndërtohet në një zonë të Rafah të pastruar nga tunelet e Hamasit dhe do të ketë hyrje-dalje të monitoruara nga personel izraelit. Sipas tij, struktura do të shërbejë për të strehuar palestinezët që duan të largohen nga Gaza drejt Egjiptit, por edhe ata që zgjedhin të qëndrojnë.

Avivi, themelues i Forumit Izraelit të Mbrojtjes dhe Sigurisë që përfaqëson mijëra rezervistë, e bëri të qartë megjithatë se nuk flet në emër të ushtrisë izraelite. Ushtria dhe zyra e kryeministrit nuk komentuan mbi ekzistencën e një plani zyrtar për ndërtimin e kampit. Deklaratat vijnë në një moment kur Izraeli po përgatitet për një “rihapje të kufizuar” të pikës kufitare Rafah me Egjiptin, një element kyç i planit të presidentit amerikan Donald Trump për përfundimin e luftës në Gaza.

Burime të cituara nga Reuters thanë se Izraeli synon që më shumë palestinezë të largohen nga Gaza sesa të lejohen të hyjnë, ndonëse zyrtarët izraelitë mohojnë se bëhet fjalë për zhvendosje të detyruar. Sipas Avivit, Rafah tani pothuajse është boshatisur nga banorët e Gazës dhe nevojitet ndërtimi i infrastrukturës për të strehuar qindra mijëra njerëz, të cilët më pas do të vendosin vetë nëse do të largohen apo jo. Ai shtoi se kampi mund të jetë një strukturë e madhe dhe e organizuar, ku do të zbatohen kontrolle identiteti, përfshirë teknologji të avancuara. Nga ana tjetër, autoritetet e Gazës të drejtuara nga Hamasi e cilësuan idenë si një mbulim të “zhvendosjes së detyruar”.

Palestinezët në Gaza, të goditur rëndë nga lufta dhe të përballur prej kohësh me kufizime të lëvizjes dhe mbikëqyrje të rreptë, shprehin shqetësime për qëllimet e këtij projekti.

Top Channel