Në sezonin e tij të tretë me Portokallinjtë, trajneri holandez bëhet krahu i djathtë i Koeman përpara Kupës së Botës 2026.
Ruud van Nistelrooy po rikthehet në skenën e madhe të futbollit ndërkombëtar, këtë herë jo nga stoli i një klubi anglez, por si anëtari i ri i stafit teknik të ekipit kombëtar holandez. 49-vjeçari do të marrë zyrtarisht detyrat e ndihmëstrajnerit më 1 shkurt, me misionin për të forcuar punën e Ronald Koeman përpara Kupës së Botës verën e ardhshme në Shtetet e Bashkuara, Kanada dhe Meksikë.
Fundi i “thriller”-it anglez.
Vendimi i Van Nistelrooy për t’u rikthyer në atdhe vjen pas një periudhe të trazuar në Premier League. Pavarësisht faktit se emri i tij luajti fort për një rikthim në stolin e Manchester United si trajner pas shkarkimit të Ruben Amorim, “Djajtë e Kuq” zgjodhën në fund Michael Carrick. Pas kohës së tij në Leicester, sulmuesi ikonik zgjodhi të largohej nga presioni i përditshëm i klubeve dhe t’i përkushtohej përgatitjes për “Portokallinjtë”.
Një “ekspert” për linjën e sulmit.
Koeman ishte i qartë pse zgjodhi Van Nistelrooy. Përvoja e tij si një nga golashënuesit më të mirë në historinë e futbollit (Real Madrid, United, PSV) është “çelësi” i zhvillimit të sulmuesve holandezë. “Ruud i njeh rregullat e futbollit në nivelin më të lartë. Për shkak të përvojës së tij si sulmues, ai mund t’i ndihmojë lojtarët tanë individualisht. Ai është një shtesë e vlefshme”, tha Koeman.
Periudha e tretë në Ekipin Kombëtar
Kjo nuk është hera e parë që Van Nistelrooy është ulur në stolin e ekipit të tij kombëtar. Kjo është periudha e tij e tretë si asistent, pasi ka shërbyer në të njëjtin rol në periudhën 2014-2016 nën drejtimin e Guus Hiddink dhe Danny Blind dhe në Euro 2021 si anëtar i stafit.
“Kupa e Botës është një nder i madh”
Vetë Van Nistelrooy nuk e fshehu entuziazmin e tij për sfidën e re: “Të përfaqësosh Holandën në një Kupë Bote është një nder i madh. Me përvojën që kam fituar nga role të ndryshme, e di që ky pozicion më përshtatet në mënyrë të përkryer. Pres me padurim të kontribuoj në një turne të suksesshëm.”
Federata holandeze (KNVB), nëpërmjet drejtorit Nigel de Jong, theksoi se zgjerimi i stafit (i cili tashmë përfshin Erwin Koeman dhe Wim Jonk) u konsiderua i nevojshëm për shkak të kërkesave të larta të një Kupe Bote, në mënyrë që çdo lojtar të ketë vëmendjen individuale që i nevojitet.
Top Channel
