Claudette Colvin, simbol i luftës kundër ndarjes racore në SHBA, ndërron jetë në moshën 86-vjeçare 14/01 11:29
Ministrat e jashtëm të Danimarkës dhe Groenlandës do të takohen sot në Shtëpinë e Bardhë për bisedime që synojnë uljen e përshkallëzimit të krizës mbi ishullin e madh Arktik, një territor autonom që i përket Danimarkës dhe që Presidenti i SHBA-së Donald Trump dëshiron ta vërë nën kontrollin e SHBA-së.
Që kur u kthye në presidencë, Trump ka përmendur shpesh mundësinë që SHBA-të të marrin kontrollin e Groenlandës, një ishull me popullsi të rrallë në një vendndodhje strategjike. Kërcënimet e tij po shihen ndryshe pas operacionit amerikan në Karakas në fillim të këtij muaji që çoi në kapjen e Presidentit Venezuelan Nicolas Maduro.
Ministri i Jashtëm danez Lars Lokke Rasmussen kishte kërkuar bisedime me homologun e tij amerikan Marco Rubio. Megjithatë, takimi do të zhvillohet në Shtëpinë e Bardhë, pasi edhe zëvendëspresidenti amerikan J.D. Vance ka kërkuar të marrë pjesë. Lokke Rasmussen ka thënë se shpreson të sqarojë “disa keqkuptime” gjatë takimit, ndërsa Danimarka dhe Groenlanda hedhin poshtë mundësinë që ishulli t’ia kalojë kontrollin SHBA-së, pavarësisht faktit se presidenti amerikan përsëriti të dielën se do ta bënte këtë “në mënyrën e lehtë ose të vështirë”.
Miliarderi republikan thekson se SHBA-të kanë nevojë për Groenlandën për të kufizuar zgjerimin e Rusisë dhe Kinës në Arktik.
“Kriza gjeopolitike”
Sipas Penny Naas, një studiuese në Fondin Gjerman Marshall të Shteteve të Bashkuara (GMFUS), një qendër për studimin e marrëdhënieve transatlantike, takimi i sotëm mund të jetë i shkurtër nëse amerikanët këmbëngulin në kërkesën e tyre për të blerë Groenlandën pavarësisht kostos.
Megjithatë, “nëse ka një nuancë të vogël diferencimi, kjo mund të çojë në një bisedë të ndryshme”, tha ai.
“Po përballemi me një krizë gjeopolitike dhe, nëse duhet të zgjedhim midis Shteteve të Bashkuara dhe Danimarkës tani, ne zgjedhim Danimarkën”, tha kryeministri i Groenlandës, Jens-Frederik Nielsen, në një konferencë për shtyp gjatë një vizite në Kopenhagen të martën.
“Groenlanda nuk do t’i përkasë Shteteve të Bashkuara. Groenlanda nuk do të qeveriset nga Shtetet e Bashkuara. Groenlanda nuk do të bëhet pjesë e Shteteve të Bashkuara”, tha ai.
I pyetur për komentet e Nielsen, Trump tha: “Epo, ky është problemi i tyre”. “Nuk di asgjë (për kryeministrin e Groenlandës), por ky do të jetë një problem i madh për të”, shtoi ai.
Krahas Nielsen, kryeministrja daneze Mette Frederiksen tha se nuk ishte e lehtë t’i rezistohej “presionit krejtësisht të papranueshëm nga aleati ynë më i ngushtë”.
Danimarka, një anëtare e NATO-s , hedh poshtë akuzat e SHBA-së se nuk po e mbron në mënyrë të mjaftueshme Groenlandën nga Rusia dhe Kina. Kopenhageni thekson se, ndër të tjera, ka investuar pothuajse 90 miliardë korona (12 miliardë euro) për të forcuar praninë e saj ushtarake në Arktik.
Menjëherë pas takimit në Shtëpinë e Bardhë, një delegacion nga Kongresi Amerikan – i përbërë kryesisht nga demokratë, por edhe një republikan – do të udhëtojë për në Kopenhagen për të shprehur solidaritetin e tij me Danimarkën.
“Kërcënimet e vazhdueshme të Presidentit Trump ndaj Groenlandës nuk ndihmojnë dhe nuk bëjnë gjë tjetër veçse dobësojnë aleancën tonë brenda NATO-s”, tha senatori demokrat Dick Durbin, i cili do të jetë pjesë e këtij delegacioni.
Ministri i Jashtëm gjerman mbi mundësinë e aneksimit ushtarak të Grenlandës nga SHBA-të: “Nuk kam asnjë indikacion se po merret seriozisht në konsideratë”
Top Channel
