Britania dhe Franca bombardojnë depo nëntokësore të ISIS-it në Siri

Lajmi është konfirmuar nga Ministria britanike e Mbrojtjes.

Sipas njoftimit zyrtar, avionë luftarakë britanikë RAF Typhoon u bashkuan me avionët francezë për të goditur objektivin, i cili ndodhej në një zonë malore në veri të qytetit të lashtë të Palmyrës, në Siri qendrore. Analiza e kujdesshme e inteligjencës tregonte se objekti shërbente për magazinimin e armëve dhe eksplozivëve.

“Avionët tanë përdorën bomba të drejtuara Paveway IV për të goditur disa tunele hyrëse të objektit. Treguesit fillestarë sugjerojnë se objektivi u godit me sukses,” bëri të ditur Ministria e Mbrojtjes e Mbretërisë së Bashkuar.

Sipas autoriteteve, nuk ka asnjë shenjë se nga sulmi i kryer të shtunën në mbrëmje janë dëmtuar civilë, ndërsa të gjithë avionët u kthyen të sigurt në bazë. Avionët Typhoon FGR4 u mbështetën gjithashtu nga një avion cisternë Voyager për furnizim në ajër.

Ministri britanik i Mbrojtjes, John Healey, deklaroi se operacioni tregon vendosmërinë e Mbretërisë së Bashkuar për të vepruar krah për krah me aleatët në luftën kundër terrorizmit.

“Ky veprim tregon lidershipin e Britanisë dhe vendosmërinë tonë për të parandaluar çdo ringritje të Daesh-it dhe ideologjive të tij të dhunshme në Lindjen e Mesme,” tha Healey.

RAF ka kryer patrullime ajrore mbi Siri që prej humbjes territoriale të ISIS-it në vitin 2019, me qëllim parandalimin e një rikthimi të grupit terrorist. Britania është pjesë e koalicionit ndërkombëtar që prej vitit 2014, duke përdorur dronë dhe avionë luftarakë kundër objektivave të ISIS-it.

Sipas Kombeve të Bashkuara, ISIS ende ka mes 5.000 dhe 7.000 luftëtarë aktivë në Siri dhe Irak. Muajin e kaluar, edhe ushtria amerikane kreu sulme masive kundër objektivave të këtij grupi në Siri, pas një prite ku u vranë dy ushtarë amerikanë dhe një përkthyes civil pranë Palmyrës.

Top Channel