Video/ Edhe në -45 gradë Celsius, qyteti më i ftohtë në botë funksionon normalisht 15/12 22:51
Shira të rrëmbyeshëm kanë goditur Rripin e Gazës, duke përmbytur kampet e refugjatëve për javën e dytë radhazi dhe duke zhytur ne ujë mijëra tenda të improvizuara.
Parashikimet e motit tregojnë përkeqësim të kushteve dhe Gjysmëhëna e Kuqe Egjiptiane ka marrë masa për dërgimin e ndihmave të mëtejshme për të ndihmuar popullsinë e rraskapitur të përballojë dimrin. Një ndihmë emergjence është organizuar ndërsa mungesa e karburantit paralizon spitalet e Gazës, duke përkeqësuar atë që agjencitë e ndihmës po e përshkruajnë si një “emergjencë katastrofike humanitare”.
Agjencitë humanitare kanë paralajmëruar se moti i keq ka përkeqësuar ndjeshëm kushtet për mbi një milion njerëz të zhvendosur që nuk kanë strehim të përshtatshëm dimëror. “Me shumicën e shtëpive të përhershme në Gaza të shkatërruara pas muajsh bombardimesh izraelite”, raportoi Gjysmëhëna e Kuqe Egjiptiane, “shumë familje janë strehuar nën çarçafë të hollë plastike ose në tenda të improvizuara të bëra nga metal skrap, kanavacë dhe mushama. Përmbytjet i kanë bërë shumë strehimore të pabanueshme, duke i detyruar familjet të lëvizin vazhdimisht në kërkim të tokës së thatë, thanë organizatat humanitare”.
Organizatat humanitare, raporton agjencia e ndihmës, kanë paralajmëruar se kushtet e këqija të motit mund të rrisin rastet e hipotermisë, infeksioneve të frymëmarrjes dhe sëmundjeve të transmetuara nga lagështia, veçanërisht tek fëmijët e kequshqyer. Ata thanë se mungesat e mëdha të ujit të pastër, karburantit për ngrohje, batanijeve dhe veshjeve dimërore e kanë lënë pjesën më të madhe të popullsisë shumë të cenueshme, ndërsa shpërndarja e ndihmës vazhdon të jetë shumë më e pamjaftueshme se sa nevojitet. Familjet po djegin çdo gjë për të qëndruar ngrohtë, pavarësisht rreziqeve serioze shëndetësore që paraqesin tymi toksik.
Ndihma egjiptiane për Gazën ka qenë në veprim të vazhdueshëm që nga 27 korriku, duke shpërndarë mijëra ton ushqim, miell, formulë për foshnje, ilaçe, pajisje mjekësore, artikuj higjiene personale dhe karburant, falë përpjekjeve të 35,000 vullnetarëve.
Që nga tetori i vitit 2023, Egjipti ka kryer atë që e quan “operacioni më i madh dhe më i qëndrueshëm humanitar për Gazën”, duke punuar në koordinim me Kombet e Bashkuara dhe partnerë të tjerë ndërkombëtarë. Autoritetet egjiptiane thonë se mbi 665,000 ton ndihma janë dorëzuar përmes kalimeve kufitare Rafah dhe Karm Abu Salem, “pavarësisht kufizimeve që lidhen me bllokadën e vazhdueshme izraelite”.
Top Channel
