Serie A/ Mbrëmje epike për Lazion, bardhekaltrit triumfojnë në transfertë me 9 lojtarë

Biancocelestët mbetën fillimisht me dhjetë lojtarë pas kartonit të kuq të Zaccagnit në minutën e 42-të për një ndërhyrje me këmbë të lartë, ndërsa situata u përkeqësua edhe më shumë në minutën e 78-të, kur Basic u ndëshkua gjithashtu me të kuq për një faull hakmarrës. Megjithatë, pavarësisht se luajtën me vetëm nëntë lojtarë kundër njëmbëdhjetë, Lazio arriti të triumfonte falë golit vendimtar të Noslin në minutën e 82-të.

Takimi nisi me ritëm, teksa Cancellieri vuri në provë portierin Corvi që në minutën e 4-t, ndërsa Provedel u tregua i sigurt përballë goditjes së Bernabé në minutën e 14-të. Parma rrezikoi sërish me Estevez, i cili iu afrua golit në minutën e 16-të, por pa arritur ta dërgonte topin në rrjetë.

Lazio reagoi dhe kërkoi avantazhin, me Basic që u afrua në minutën e 39-të, por Corvi mbeti i pakalueshëm. Gjithçka ndryshoi në minutën e 42-të, kur Zaccagni u përjashtua me karton të kuq direkt, duke e lënë Lazion në inferioritet numerik.

Në pjesën e dytë, Parma u përpoq të shfrytëzonte epërsinë e lojtarëve, duke rritur presionin ndaj portës së Provedel, por pa konkretizim. Në minutën e 78-të erdhi edhe përjashtimi i dytë për Lazion, me Basic që la skuadrën me nëntë lojtarë, duke e bërë ndeshjen të dukej e humbur për miqtë.

Por surpriza ndodhi në minutën e 82-të, kur Noslin, i futur si zëvendësues, tregoi nuhatje dhe vendosmëri në zonë, duke mposhtur Corvin me një goditje të saktë me të majtën për golin e fitores. Provedel ishte vendimtar në fund, me një pritje të shkëlqyer në minutën e 85-të, duke ruajtur avantazhin.

Me këtë sukses, Lazio ngjitet në kuotën e 22 pikëve dhe afrohet me zonën evropiane, ndërsa Parma humbet një mundësi të artë dhe mbetet në 14 pikë në renditje.

Top Channel