Kupa e Botës 2026 do të jetë e para në histori që do të organizohet nga tre vende, SHBA, Kanada dhe Meksikë.
Turneu i trefishtë premton një panoramë mbresëlënëse futbolli, por në të njëjtën kohë krijon edhe një faktor të ri që mund të ndikojë në performancën e ekipeve: udhëtimet ajrore.
Pavarësisht përpjekjeve të FIFA-s për të kufizuar udhëtimet në distanca të gjata duke i ndarë ekipet në zona gjeografike, distancat janë të pashmangshme. Në fakt, ekipi që do të duhet të udhëtojë më gjatë do të përshkojë afërsisht 4,600 kilometra më shumë se ai me orarin më të shkurtër.
Ekipet me oraret më të ngarkuara të udhëtimit
Ekipi që del nga Play-off A i UEFA-s (Italia, Irlanda e Veriut, Uellsi ose Bosnja dhe Hercegovina) pritet të ketë ngarkesën më të lartë të udhëtimit ajror. Rruga Toronto – Los Angeles – Seattle është ekuivalente me afërsisht 5,025 kilometra, duke e bërë atë deri tani ekipin më “shtegtarë” në raundin e parë.
Udhëtime të rëndësishme do të bëhen gjithashtu nga:
Algjeria: ~ 4,840 km (Kansas City – San Francisko – Kansas City)
UEFA Play-off D (Danimarkë, Republika Çeke, Irlandë ose Maqedonia e Veriut): ~4,500 km.
Afrika e Jugut : ~3,900 km.
Play-Off Ndërkontinentale (Xhamajka, Republika Demokratike e Kongos ose Kaledonia e Re): ~3,690 km.
Vlen të përmendet se dy nga kundërshtarët e Meksikës në grup – Afrika e Jugut dhe skuadra që do të dalë nga Play-off-et Europiane D – janë gjithashtu ato që do të përshkojnë distancat më të gjata.
Grupet me programin më të lehtë të udhëtimit
Nga ana tjetër, ekipi që do të udhëtojë më pak është Egjipti, me vetëm 408 kilometra udhëtim total midis Seattle dhe Vancouver. Pak më shumë do të mbulohet nga:
Paraguai : ~550 km.
Panamaja : ~560 km.
Senegali : ~560 km.
Franca : ~580 km.
Këto ekipe do të kenë një avantazh të qartë për sa i përket pushimit dhe përshtatjes, veçanërisht në një grup ku çdo detaj mund të jetë vendimtar.
Po Meksika dhe Argjentina?
Pavarësisht se është një nga vendet pritëse, Meksika do të duhet të udhëtojë më shumë kilometra sesa Argjentina, e cila është gjithashtu midis 10 ekipeve me më pak udhëtime. Argjentina, e cila e hap fushatën e saj në Kansas City kundër Algjerisë përpara se të udhëtojë në Dallas për Austrinë dhe Jordaninë, do të përshkojë vetëm 740 kilometra në raundin e pare, një nga udhëtimet më të rehatshme të turneut.
Nga ana tjetër, Meksika do të ketë nevojë për një fluturim shtesë në orarin Mexico City – Guadalajara – Mexico City për ndeshjet kundër Afrikës së Jugut, Koresë së Jugut dhe përfaqësueses evropiane. Gjithsej: 920 kilometra, por prapë në kategorinë e ekipeve me udhëtimin më të lehtë.
Top Channel
