Inter-Milan drejt një rekordi të ardhurash në derbin e parë si pronarë të San Siros 22/11 10:50
Ish-mbrojtësi i Milanit, Filippo Galli, i cili ka luajtur disa nga derbit më të zjarrtë të futbollit italian, ka rrëfyer momentin që ai e konsideron më ikonik në historinë e kuqezinjve kundër Interit.
Në një intervistë për Sportmediaset, Galli kujtoi golin e famshëm të Mark Hateley ndaj Collovatit në vitin 1984.
“Pa ofendim për mikun tim Fulvio, por ai gol përfaqëson Milanin më shumë se çdo gjë tjetër. Janë bërë 40 vite dhe ende shumë njerëz e mbajnë atë foto në shtëpi,” – tha ai.
Duke folur për derbin që po afron, Galli u shpreh se Milani po vjen me më shumë vetëbesim se një vit më parë: “Këtë vit ata e dinë se mund të fitojnë ndaj kujtdo. Sezonin e kaluar dukej sikur mund të humbnin me këdo. Kundër Interit do të jetë shumë e vështirë, por me rikthimin e Tomorit dhe Rabiot, mbrojtja mund të rikthehet në nivelin e duhur.”
Ai shtoi se lodhja dhe mungesat kanë ndikuar në paraqitjet e fundit: “Përdorimi i vazhdueshëm i Modric ka sjellë pak lodhje. Mbrojtja nuk ishte aq e mbrojtur sa më parë.”
Galli foli me entuziazëm për Matteo Gabbia-n, një futbollist që ai e ka drejtuar në akademinë e të rinjve të Milanit: “Ai mishëron aftësinë për të mësuar dhe për t’u përmirësuar. Nuk të befason me ndonjë gjë të jashtëzakonshme, por ka qëndrueshmëri dhe lidership. E shndërruam në qendërmbrojtës 13 vite më parë sepse donim të ndërtonim nga mbrapa.”
Galli paralajmëron se Milani nuk duhet të tërhiqet shumë prapa: “Nuk dua që të bien shumë në zonën e tyre. Interi ka lojtarë që manovrojnë në hapësira të ngushta. Kuqezinjtë duhet të jenë vigjilentë dhe të kundërsulmojnë.”
I pyetur se cilin lojtar do t’i “vidhte” Interit, Galli iu përgjigj me humor: “Në përgjithësi, jo. Por do të bëja një përjashtim për Darmianin, pasi ai doli nga akademia jonë.”
Sipas ish-mbrojtësit: “Ndeshjet vendosen në mesfushë. Me Rabiot, Milani fiton më shumë forcë. Interi ka shumë cilësi e shpejtësi, ndaj Rabiot mund të jetë vendimtar.”
Ky derbi do të jetë historik edhe për faktin se San Siro ndodhet në fazën e fundit para zëvendësimit me një stadium të ri: “Jam i lidhur me këtë impiant dhe më vjen keq që po shembet. Por futbolli duhet të ecë drejt qëndrueshmërisë.”
Ai kujtoi emocionet e hyrjes në fushë: “Kur hynim nga këndi dhe shihje Fossa dei Leoni përballë, dukej sikur stadiumi vinte drejt teje.”
Sipas Gallit, me Allegrin në stol, objektivat janë të larta: “Allegrin dhe Tare i shoh si garantues të projektit. Mendoj se Milani mund të synojë Scudetton, por gjithçka do të varet nga sprinti final.”
I pyetur për rezultatin e derbit, Galli u përgjigj me qeshje: “Jam supersticioz, kështu që them 1-1. Nëse fiton Milani, aq më mirë.”
Top Channel
