Anglia do të luajë ndaj Kombëtares shqiptare në Air Albania Stadium, në sfidën përmbyllëse të kualifikueseve të Botërorit 2026. ‘Tre Luanët’ tashmë janë kualifikuar direkt për në kompeticionin e vitit të ardhshëm, por trajneri Tuchel nuk e fsheh ambicien e tij për të fituar ndeshjen ndaj kuqezinjve.
‘Duam të fitojmë përsëri, do të përballemi më Shqipërinë, një skuadër që është e vështirë të thyhet. Gjatë kualifikueseve kanë pësuar vetëm 3 gola, 2 nga ne dhe 1 tjetër. Është e vështirë të shënohet ndaj tyre-u shpreh trajneri gjerman i Tre Luanëve
Tuchel më pas iu përgjigj pyetjes nëse e priste që Shqipëria do të renditej në vendin e dytë në momentin që u hodh shorti.
‘Unë pashë që Shqipëria dhe Serbia janë shumë të apasionuar pas kombëtareve të tyre, gjithnjë kanë pasur futbollistë të talentuar që luajnë në ligat më të mëdha kështu që mendova se të dyja ishin skuadrat për t’u mundur. Tani shohim se Shqipëria me meritë u rendit në vendin e dytë. Është shumë e vështirë te krijosh dhe të shënosh ndaj saj. Mendoj se do të dominojmë lojën, mendoj dhe shpresoj, por vetëm zotërimi i topit nuk bën punë, kështu që do të na duhet të kontrollojmë lojën dhe të kemi kujdes nga kundërsulmet. Duhet të përpiqemi dhe të kthejmë zotërimin e topit në shanse, nëse i kemi këto, ne normalisht kemi mjaftueshëm aftësi për të shënuar, por presim një ndeshje të vështirë’-shtoi Tuchel
Thomas Tuchel foli edhe për Armando Brojën të cilin e ka pasur nën urdhrat e tij kur ishte te Chelsea.
‘E njoh Brojën shumë mirë sepse ka qenë futbollisti im te Chelsea. Ai luan rregullisht për Shqipërinë dhe në të shumtën e kohës në krahun e djathtë, kështu që ne presim që ai të jetë në fushë. Ai sjell shpejtësi dhe është i rrezikshëm sepse ai mendon gjithnjë të shënojë. Shpresojmë që të kemi zgjidhjet për ta mbuluar’-theksoi trajneri gjerman i nënkampionëve të Evropës
Top Channel
