Tajvani… ‘vija e kuqe’! Kina paralajmëron qytetarët: Mos udhëtoni në Japoni, lekët e biletave të prenotuara do kthehen mbrapsht 15/11 18:45
Papa Leo XIV u takua sot në Pallatin Apostolik të Vatikanit me aktorë, regjisorë dhe skenaristë nga e gjithë bota, me qëllimin e dukshëm — siç raportojnë komentatorët — për të projektuar një imazh pozitiv të tij dhe të Kishës Katolike Romake.
Në takim morën pjesë Cate Blanchett, Monica Bellucci, Spike Lee, Emir Kusturica, Giuseppe Tornatore, Gus Van Sant dhe Stefania Santrelli. Të gjithë artistët u takuan dhe e përshëndetën Papën personalisht. Siç raportohet, Spike Lee i dhuroi Papës një fanellë nga kampionati amerikan i basketbollit, me mbishkrimin “Papa Leo 14”, ndërsa Cate Blanchett i dha një byzylyk.
“Koha jonë ka nevojë për njerëz që dëshmojnë për shpresën, të vërtetën, bukurinë. Me punën tuaj artistike, ju mund ta përmbushni këtë detyrë. Autenticiteti i imazhit duhet të ruhet, me qëllim që të promovohet dhe mbrohet dinjiteti njerëzor. Kinemaja e mirë, regjisorët dhe protagonistët e saj mund ta arrijnë këtë”, tha Papa.
Sipas Papës, kinemaja është një art popullor në kuptimin më të lartë, i destinuar dhe i arritshëm për të gjithë, dhe ka evoluar në “një shprehje të dëshirës për të reflektuar dhe kuptuar jetën, për të rrëfyer madhështinë dhe brishtësinë e saj dhe për të kapur dëshirën për të pafundmen”. Ai tha se kinemaja është më shumë sesa thjesht imazhe lëvizëse, sepse “vë në lëvizje shpresën”. Ai iu referua edhe rënies së pjesëmarrjes në kinema. “Kinematë po përjetojnë një erozion shqetësues, i cili po i largon ato nga qytetet dhe lagjet. Ka shumë që thonë se arti i kinemasë dhe përvoja e saj janë në rrezik. U bëj thirrje institucioneve kompetente të mos e pranojnë pasivisht situatën dhe të tregojnë gatishmëri për të bashkëpunuar, në mënyrë që kjo vlerë shoqërore dhe kulturore të mbështetet”, tha ai.
Disa ditë më parë, Papa zbuloi edhe katër filmat e tij të preferuar: “It’s a Wonderful Life” nga Frank Capra, “The Sound of Music” nga Robert Wise, “Ordinary People” nga Robert Redford dhe “Life is Beautiful” nga Roberto Benigni.
Vëzhguesit e Vatikanit thonë se takimi synon t’i japë pak “shkëlqim” Papës, i cili është i pari amerikan në historinë e Kishës Katolike. Përveç promovimit të figurës së Papës, qëllimi është edhe projektimi i një imazhi pozitiv të Kishës Katolike Romake.
Vatikani nisi menjëherë ndërtimin e imazhit publik të Leos pas zgjedhjes së tij në maj. Brenda pak ditësh, Leo — një adhurues i zjarrtë i tenisit — mirëpriti italianin numër 1 në botë, Yannick Sinner.
Top Channel
