“Mos më “vrisni” me tituj”, aktorja Millie Brown u kërkon gazetarëve të ndalojnë së komentuari imazhin e saj

Aktorja 21-vjeçare, e njohur për rolin në serialin “Stranger Things”, ka kritikuar ashpër gazetat për mënyrën denigruese me të cilën e trajtojnë në artikujt që komentojnë pamjen dhe stilin e saj.
Në një intervistë për British Vogue, Brown e quajti këtë sjellje “një formë ngacmimi publik”, duke shtuar se nuk i detyrohet askujt një falje për mënyrën se si duket apo për mënyrën se si zgjedh të shprehet.

Millie Bobby Brown Demands the Press Stop Slamming Her Body in Article Headlines: 'I Respect Journalism' but 'Get Off My F—ing Case. I Am 21' https://t.co/5fjt0rsUq8

— Variety (@Variety) November 5, 2025

Aktorja kujtoi se muaj më parë kishte shpërthyer në lot pas publikimit të disa titujve që talleshin me pamjen e saj gjatë promovimit të filmit të Netflix-it “The Electric State”. “Qaja çdo ditë kur shihja ato tituj: ‘Çfarë i ka bërë fytyrës? Pse është bërë bjonde? Duket 60 vjeç!’”, tha ajo me ironi.
Brown theksoi se, megjithëse e respekton gazetarinë, ajo dënon mënyrën toksike të disa mediave që përqendrohen te pamja dhe jo te puna e një artisti. “E kuptoj që paparacët janë pjesë e punës, por mos më ‘vrisni’ me titujt. Kjo është ngacmim, veçanërisht për vajzat e reja që hyjnë në këtë industri dhe fillojnë të dyshojnë te vetja”, u shpreh ajo.

Aktorja kujtoi edhe një moment të vështirë gjatë BRIT Awards, kur shpërtheu në lot pas skene, pak para se t’i dorëzonte një çmim këngëtares Sabrina Carpenter. “Qava me dënesë. Por kur pashë Sabrinën, ajo më kujtoi që nuk duhet t’i lejoj askujt të më thyejë shpirtin. Më dha forcë”, rrëfeu Brown.
Në vijim, ajo shtoi se vendosi të postojë një video në Instagram për t’u bërë ballë kritikëve: “Nëse të shqetëson që jam bjonde apo që mbaj më shumë grim, do ta përballoj unë – jo vetëm për veten time, por për çdo vajzë që do të eksperimentojë me pamjen e saj.”

Në fund të intervistës, Millie u shpreh prerazi: “Është shqetësuese që redaktorë të rritur shpenzojnë kohën duke analizuar fytyrën, trupin dhe zgjedhjet e mia. Akoma më keq kur këto artikuj shkruhen nga gra. Flasim për fuqizim të femrave, por shpesh i shkatërrojmë për klikime. Unë refuzoj të kërkoj falje që jam rritur dhe që jetoj sipas kushteve të mia. Nuk do të turpërohem për mënyrën se si dukem, si vishem apo si e prezantoj veten.”

Top Channel