Arsenal është thjesht perfekt në këtë sezon të Ligës së Kampioneve. Skuadra e drejtuar nga Mikel Arteta mposhti Slavian e Pragës 3-0 në transfertë në raundin e katërt të kompeticionit dhe është në krye me 12 pikë të plota.
Skuadra ceke u përpoq të vërë në vështirësi Arsenalin në pjesën e parë, por nga minuta e 30 ndeshja nisi të vihej në drejtimin e dëshiruar nga londinezët të cilët zhbllokuan rezultatin në minutën e 32 me Saka që shënoi nga pika e bardhë e 11 metërshit. Pas këtij goli Arsenali pati shanse të tjera shënimi, por pjesa e parë u mbyll me avantazhin 1-0 të Topcinjve.
Në fillimin e pjesës së dytë, Arsenali dyfishoi rezultatin në 2-0 me Mikel Merino pas një asisti të Trossard. Kaluan pak më shumë se 20 minuta dhe të besuarit e Artetës vunë ndeshjen në kasafortë teksa shënuan edhe golin e tretë, sërish me Merinon, por këtë radhë ishte Declan Rice ai që gjeti saktë sulmuesin spanjoll për të fiksuar fitoren 3-0 me Arsenalin që jo vetëm është në kuotën e 12 pikëve të plota, por nuk ka asnjë gol të pësuar në 4 ndeshjet e para të Ligës së Kampioneve.
Top Channel
