Skandal në futbollin italian, prokuroria sekuestron klubin pas dyshimeve për përfshirjen e Camorrës në administrimin e tij 22/10 10:15
Të marrësh drejtimin e Interit pas një fund-sezoni të vështirë dhe kaotik nuk është detyrë e lehtë – veçanërisht kur je një trajner pa përvojë në nivelet më të larta. Por Cristian Chivu, në vetëm pesë muaj, ka arritur të shndërrojë skepticizmin në besim dhe të ngjallë entuziazëm në të gjithë ambientin zikaltër.
Nga lojtarët “të rilindur” – siç do të thoshte Niccolò Barella – deri te tifozët, të gjithë janë bindur nga puna e trajnerit rumun. Fillimi i tij në pankinën e Interit nuk u prit me shumë entuziazëm, por rezultatet në fushë flasin vetë: shtatë fitore radhazi në të gjitha garat, përfshirë suksesin e fundit në Bruksel kundër Union Saint-Gilloise.
Duke lënë mënjanë përvojën e diskutueshme në Kupën e Botës për Klube (me dy fitore, një barazim dhe eliminim nga Fluminense), Chivu ka regjistruar një mesatare prej 2.4 pikësh për ndeshje në 10 sfidat e para mes Serie A dhe Ligës së Kampionëve – një bilanc prej 8 fitoreve dhe vetëm 2 humbjesh.
Ky është një nga fillimet më të mira historikisht për një trajner të Interit në epokën e Serie A me 20 skuadra (nga sezoni 2004/05 e në vazhdim). Më mirë se ai, vetëm Luciano Spalletti në sezonin 2017/18, i cili grumbulloi 26 pikë (8 fitore dhe 2 barazime), por me një ndryshim thelbësor: atë sezon, Interi nuk mori pjesë në asnjë kompeticion tjetër përveç kampionatit.
Në të njëjtin nivel me Chivu, me 24 pikë në 10 ndeshje, është edhe Leonardo, i cili mori drejtimin në janar 2011, sërish vetëm në ndeshje të Serie A.
Pak më poshtë në këtë renditje vijnë Jose Mourinho dhe Simone Inzaghi, me një mesatare prej 2.2 pikësh për ndeshje në 10 sfidat e tyre të para.
Pas fitoreve në Romë dhe Bruksel, Interi i Chivus ka edhe një tjetër provë të vështirë: sfidën në transfertë kundër Napolit, e treta radhazi larg “San Siros”. Por me formën aktuale dhe ritmin e vendosur, trajneri rumun duket i vendosur të mos ndalet dhe të vazhdojë marshimin e tij drejt hyrjes në historinë e Interit.
Top Channel
