Video/ Pamje tronditëse! Po luanin me çakmak pranë fuçive të naftës, dy të rinjtë filmohen kur hidhen në erë 12/01 22:50
Një gjykatë federale apeli në SHBA ka vendosur që Presidenti Donald Trump mund të dislokojë trupat e Gardës Kombëtare në Portland, Oregon, duke rrëzuar një urdhër të mëparshëm që e ndalonte këtë veprim.
Vendimi i gjykatës hap rrugën për vendosjen e rreth 200 trupave federale për të mbrojtur ndërtesat qeveritare, pavarësisht kundërshtimeve të ashpra nga autoritetet lokale dhe zyrtarët e shtetit të Oregonit.
Paneli prej tre gjyqtarësh të Gjykatës së Apelit të Qarkut të Nëntë, me seli në San Francisko, pranoi kërkesën e Departamentit të Drejtësisë për të pezulluar urdhrin e gjyqtares së qarkut Karen Immergut, e cila më parë kishte bllokuar vendosjen e trupave.
Sipas vendimit, plani i Trump për të dërguar trupat për një periudhë 60-ditore u cilësua si “përgjigje e matur ndaj situatës së paqëndrueshme”.
Vendosja e trupave federale ishte bllokuar më herët nga gjyqtarja Immergut, e cila lëshoi një urdhër të përkohshëm kufizues ndaj përdorimit të Gardës Kombëtare të Oregonit.
Në një përpjekje të dytë, Trump kishte tentuar të dërgonte njësi nga Garda Kombëtare e Teksasit, por edhe ajo u ndalua nga gjykata.
Shteti i Oregonit ka paditur administratën Trump, duke e akuzuar për tejkalim të kompetencave presidenciale dhe ndërhyrje në çështjet lokale të sigurisë publike.
Megjithatë, vendimi i Gjykatës së Apelit e lejon dislokimin e trupave ndërkohë që sfidat ligjore vazhdojnë në proces.
Departamenti i Drejtësisë argumentoi se prania e Gardës Kombëtare është e domosdoshme për të kontrolluar protestat e dhunshme jashtë një objekti të Imigracionit dhe Doganave (ICE) në Portland, të cilat shpesh janë përshkallëzuar në përplasje me agjentët federalë.
“Presidenti Trump po ushtron autoritetin e tij të ligjshëm për të mbrojtur asetet dhe personelin federal, përballë trazirave që udhëheqësit lokalë kanë refuzuar t’i adresojnë”, reagoi Shtëpia e Bardhë.
Top Channel
