E rëndë në Beograd/ Një person qëllon me breshëri drejt një lokali, pesë persona mbeten të plagosur, zbardhen detajet 30/09 17:47
Milano po përgatitet për një epokë të re futbolli dhe arkitekture. Këshilli i Qytetit miratoi shitjen e stadiumit legjendar San Siro dhe zonës përreth, duke i hapur rrugën ndërtimit të një impianti të ri modern nga AC Milan dhe FC Internazionale Milano.
Në një deklaratë të përbashkët, dy klubet reaguan menjëherë ndaj vendimit historik: “Shprehim kënaqësi për miratimin e Këshillit të Qytetit për shitjen e San Siros dhe zonës përreth: një hap historik dhe vendimtar për të ardhmen e klubeve dhe të qytetit”.
Të kuqtë e zinj dhe zikaltërit theksojnë se ky është vetëm fillimi i një procesi që do të sjellë në Milano një stadium të ri, të përmasave botërore.
“Klubet po shohin me besim dhe përgjegjësi hapat e ardhshëm që do të çojnë drejt ndërtimit të një stadiumi të ri që përmbush standardet më të larta ndërkombëtare: një strukturë e klasit botëror e destinuar të bëhet një ikonë e re arkitekturore dhe simbol i pasionit të tifozëve në mbarë botën”, thuhet në reagimin e tyre.
Entuziazëm ka ardhur edhe nga RedBird Capital, fondi që zotëron Milanin, i cili e sheh projektin si pjesë të strategjisë së tij globale për zhvillimin e infrastrukturave sportive moderne.
Ky vendim shënon një pikë kthese për futbollin dhe urbanistikën e Milanos, duke synuar që qyteti të rivalizojë kryeqytetet e mëdha evropiane me një impiant sportiv të qëndrueshëm, modern dhe ikonik.
Top Channel
