OpenAI marrëveshje 38 miliardë dollarëshe me Amazon për akses në cloud 03/11 22:58
Kryeministri spanjoll, Pedro Sánchez, ka bërë thirrje që Izraeli të mos lejohet të marrë pjesë në gara sportive ndërkombëtare për sa kohë që vijon ofensiva e tij në Gaza, që Sánchez e ka quajtur “barbarizëm”.
Vendimi vjen pas lajmeve se qeveria spanjolle ka anuluar një kontratë të rëndësishme — me vlerë afërsisht 700 milionë euro — për raketa lëshuese (rocket launchers) të prodhuara nga kompania izraeilite Elbit Systems.
Kjo kontratë, që supozohej të shërbente për blerjen e 12 sistemeve lëshuese raketash, u dha një konsorciumi kompanish spanjolle, sipas vlerësimit të Military Balance të Institutit Ndërkombëtar për Studime Strategjike.
Deklarata e Sánchez pasoi një ditë protestash pro-Palestine që detyruan anulimin e etapës përfundimtare të Vuelta a España, për shkak të përfshirjes së ekipit Israel-Premier Tech dhe përplasjeve me policinë.
Sánchez e përshkroi pjesëmarrjen e protestuesve që kundërshtojnë praninë e ekipit izraelit në garë si “lëvizje paqësore që mbrojnë të drejtat njerëzore.”
Ai tha se debati që u hap pas ngjarjeve në Madrid duhet të zgjerohet dhe të diskutohet në çdo cep të botës: “Organizatat sportive duhet të pyesin veten nëse është etike që Izraeli të vazhdojë të marrë pjesë në garat ndërkombëtare.”
Kritikat nuk munguan. Oponentët politikë të Sánchez e akuzuan atë se po përdor sportin dhe protestat për të fituar avantazhe politike dhe se po dëmton reputacionin e Spanjës në arenën ndërkombëtare.
Nga ana tjetër, Izraeli ka reaguar ashpër, duke mohuar se është duke kryer gjenocid dhe duke e cilësuar qëndrimin e Sánchez-it si antisemitet. Ministri i Jashtëm izraelit, Gideon Saar, tha se protestuesit u nxiten nga udhëheqësit spanjollë dhe akuzoi qeverinë spanjolle se po përdor retorikë që nxit urrejtje dhe përçarje.
Vende të tjera po ndjekin me vëmendje këtë lëvizje. Një zhvillim i veçantë është se Federata e Futbollit e Norvegjisë njoftoi se të ardhurat nga shitja e biletave për ndeshjen kualifikuese për Kupën e Botës 2026 kundër Izraelit do të shkojnë për ndihma humanitare për Gaza, përmes organizatës Mjekët Pa Kufij (Doctors Without Borders).
Top Channel
