Skandal në Kolorado/ Pronari i shtëpisë funerale kryen marrëdhënie me 191 kufoma, refuzon dënimin e “butë me 20 vite burg 12/09 21:57
Sekretari i Përgjithshëm i NATO-s, Mark Rutte, njoftoi sot fillimin e një misioni të ri të Aleancës, të quajtur “Roja Lindore”, me synimin për të forcuar mbrojtjen në krahun lindor të NATO-s, pas një incidenti të rëndë që përfshiu shkeljen e hapësirës ajrore polake nga dronë rusë.
Në një konferencë për shtyp, Rutte deklaroi se Aleanca është e vendosur të mbrojë çdo centimetër të territorit të saj dhe nuk do të tolerojë asnjë lloj kërcënimi ndaj vendeve anëtare. “Ne nuk mund të lejojmë që dronët rusë të shkelin hapësirën ajrore të Evropës, të NATO-s apo të Aleatëve tanë,” theksoi ai.
Sipas Komandantit Suprem të Forcave Aleate për Evropën (SACEUR), Gjeneral Alexus Grinkewicz, misioni do të përfshijë asete të reja ushtarake, duke përfshirë:
Avionë luftarakë Rafale nga Franca
Avionë F-16 nga Danimarka
Njësi të reja kundërajrore tokësore
Gjenerali Grinkewicz theksoi se këto masa kërkojnë edhe një “plan të ri mbrojtës” për të garantuar përgjigje të shpejtë dhe efektive në rast të ndonjë kërcënimi.
Të dy zyrtarët, Rutte dhe Grinkewicz, nënvizuan rëndësinë strategjike të krahut lindor të NATO-s, duke e cilësuar atë si “vijën e parë të mbrojtjes së Aleancës”. Ata theksuan se raketat ruse mund të arrijnë në qytete si Talini apo Vilniusi shumë më shpejt sesa në qytete si Madridi apo Londra. Nga ana tjetër, dronët rusë paraqesin një rrezik për të gjithë territorin e NATO-s.
Rutte dënoi ashpër incidentin e fundit me dronët rusë që shkelën hapësirën ajrore të Polonisë. Edhe pse nuk pranoi të spekulonte nëse shkelja ishte e qëllimshme, ai u shpreh qartë për rrezikshmërinë e aktit: “Pavarësisht nëse ishte një veprim i qëllimshëm apo jo, ai ishte gjithsesi i pamatur dhe i papranueshëm. Ishte një grup dronësh rusë. Edhe nëse nuk kishin ndërmend të hynin në Poloni, rezultati përfundimtar ishte ky… Dhe nëse qëllimi ishte i qëllimshëm, atëherë incidenti është edhe më serioz. Por në të dyja rastet, është i papranueshëm. Rusët po marrin rreziqe të mëdha.”
Ndërkohë, Gjenerali Grinkewicz konfirmoi se ky incident ishte më i madh se çdo tjetër i ngjashëm i ndodhur më parë.
Misioni “Roja Lindore” synon të japë një përgjigje të fortë dhe të qartë ndaj kërcënimeve të reja që vijnë nga Lindja, duke theksuar unitetin dhe gatishmërinë e NATO-s për të mbrojtur të gjithë anëtarët e saj në çdo rrethanë.
Top Channel
