Marrëveshja tregtare BE-SHBA, shumica e europianëve mendojnë se Von der Leyen plotësoi “tekat” e Trump

Sipas Guardian, sondazhi i Cluster17 për platformën Le Grand Continent tregoi se mesatarisht 77% e të anketuarve, me përqindje që variojnë nga 89% në Francë deri në 50% në Poloni besojnë se marrëveshja i sjell dobi kryesisht ekonomisë amerikane, ndërsa vetëm 2% besojnë se do t’i sjellë dobi asaj evropiane.

Anketa përfshinte qytetarë nga pesë vende, popullsia e të cilave përbën 60% të popullsisë totale të bllokut. Mesatarisht, 52% e të anketuarve e përshkruan marrëveshjen e korrikut midis Trump dhe presidentes së Komisionit, Ursula von der Leyen si “poshtëruese”.

Kujtohet se marrëveshja parashikon eliminimin e tarifave për të gjitha produktet industriale amerikane dhe akses preferencial në treg për një gamë të gjerë produktesh amerikane të peshkimit dhe bujqësisë. Megjithatë, shumica e produkteve evropiane të importuara në SHBA do t’i nënshtrohen një tarife bazë prej 15%.

Përveç kësaj, kompanitë evropiane duhet të investojnë 600 miliardë dollarë shtesë në SHBA, ndërsa BE është e angazhuar për të blerë energji amerikane me vlerë 750 miliardë dollarë dhe për të rritur në mënyrë drastike shpenzimet për eksportet amerikane të mbrojtjes. Më shumë se dy të tretat e të anketuarve i vlerësuan këto angazhime negativisht.

Von der Leyen e përshëndeti marrëveshjen si vendimtare për sigurimin e stabilitetit, duke theksuar faktin se kërcënimi i Trump për tarifa prej 30% u shmang. Megjithatë, analistët thonë se BE dha shumë më tepër sesa fitoi dhe në thelb iu dorëzua presionit nga Uashingtoni.

Ky mendim duket se ndahet nga shumica e evropianëve: mesatarisht, 75% e qytetarëve besojnë se von der Leyen ka mbështetur interesat evropiane në një mënyrë “shumë të keqe” ose “mjaft të keqe”.

Pothuajse 70% thanë se ishin të përgatitur të bojkotonin produktet amerikane për shkak të marrëveshjes, ndërsa 44% e përshkruan Trump si “një armik të Evropës”. Për më tepër, 47% e të anketuarve panë “tendenca autoritare” në sjelljen e presidentit amerikan dhe 36% e konsideruan atë të vepronte “si një diktator”.

Më shumë se tre të katërtat e të anketuarve janë të pakënaqur me mënyrën se si BE-ja e ka menaxhuar marrëdhënien e saj me Trump, me 40% që shprehin dëshirën që BE-ja t’i rezistojë “tekave” të presidentit amerikan.

Pak ditë para fjalimit të von der Leyen për “Gjendjen e Unionit” në vitin 2025 më 10 shtator, 60% e të anketuarve në pesë vende të BE-së thanë se do ta shihnin dorëheqjen e saj “shumë” ose “mjaft” pozitivisht.

Në një mesazh të qartë për Brukselin, përqindje të larta të pjesëmarrësve, nga 85% në Spanjë në 61% në Francë thanë se do të donin që vendi i tyre të mbetej në BE.

Megjithatë, 37% argumentojnë se nëse Unioni nuk arrin t’i mbrojë qytetarët e tij nga rreziqet gjeopolitike, duhet të merret në konsideratë mundësia e largimit.

Top Channel