Regjistrimet në Universitete/ “Fan S. Noli” e zgjodhën 80 maturantë, priten shtatë raunde deri në muajin shtator
30/08 19:51
Në prag të nisjes së vitit të ri shkollor më 8 shtator, Elona Sekja ka filluar me blerjet në kancelari, por jo vetëm për fëmijët e saj.
Me një listë me mjete shkollore, çanta e veshje, ajo po përpiqet të gëzojë edhe nxënësit e varfër. Duke shfrytëzuar rrjetet sociale, Elona ka bashkuar shqiptarët në një nismë në ndihmë të familjeve në pamundësi ekonomike që nuk plotësojnë dot kërkesat minimale të nxënësve.
“Shumë e bukur, reagimi i njerëzve… pra ndjeshmëria nuk ka vdekur thjesht duhet një klik për ngacmim”, shprehet Elona Sekja.
E nxitur nga një rast i dhimbshëm në zonat rurale të Shqipërisë i zbuluar nga një arsimtare, ajo kuptoi se nevoja për të ndihmuar ishte më e madhe, ndaj fushata u shtri jo thjesht në një klasë.
‘Ishte një lajmërim që ka bërë një mësuese në fillore nga fshatrat e Beratit që kërkonte ndihmë për një nxënësin e saj që prindërit skishin mundësi ti blinin as një cantë shkolle. E lexova dhe u preka. Shumë e dhimbshme të mendosh që në 2025 prindërit shqiptarë përballen me këto kushte. I them mësueses që do ja blej unë gjithçka i duhet për klasën e parë, por gjatë bisedës me të më zbuloi se ky nuk ishte rasti i vetëm!”
Në përjetimet e një prindi që ka tre fëmijë, Elona kur dëgjon për të vegjlit që nuk gëzojnë për nisjen e shkollës, nuk qëndron dot indiferente dhe beson se të gjithë mund të kontribuojnë në mënyra të ndryshme.
“Nuk pretendoj që jam as e pasur as e varfër, por të paktën të ndihmoj atë që ska mundem. Të qënurit indiferent na prek të gjithëve se jetojmë në shoqëri. Nuk funksionojmë fëmija im, pragu i derës sime. Bashkë mund të kontribuojmë me aq mundësi sa kemi të përmirësojmë jetën e atij që nuk ka sot”.
Top Channel
