Eurovision-i në Austri, zbulohet qyteti dhe data e festivalit më të madh të muzikës europiane

Finalja e madhe do të zhvillohet më 16 maj, ndërsa gjysmëfinalet janë planifikuar për 12 dhe 14 maj në Wiener Stadthalle, arenën më të madhe të brendshme të Austrisë.

Vendimi vjen pas fitores së JJ nga Austria në edicionin e këtij viti, i mbajtur në Bazel, Zvicër, me këngën “Wasted Love”, një kombinim i ritmeve techno me vokale operistike. Me këtë triumf, Austria siguroi të drejtën të presë Eurovision-in vitin e ardhshëm.

Viena, e cila kishte mikpritur më parë konkursin në 1967 dhe 2015, e mundi kandidatin tjetër të madh, Innsbruckin, për të marrë ngjarjen më prestigjioze muzikore të Evropës. Slogani i Eurovision 2026 do të jetë: “Europe, shall we dance?”, duke i bërë homazh energjisë dhe diversitetit që shoqëron konkursin.

Eurovision është i njohur si platforma më e madhe e muzikës pop, duke shpallur emra të mëdhenj si ABBA, Céline Dion, Cliff Richard dhe Olivia Newton-John. Vetëm këtë vit, rreth 166 milionë shikues në 37 vende ndoqën konkursin, ndërsa rekord 60% e të rinjve 15-24 vjeç ndoqën ngjarjen, me një angazhim të madh edhe në rrjetet sociale Instagram dhe TikTok.

Eurovision shpesh ka shkaktuar debate dhe polemika. Aktivistë pro-palestinezë protestuan gjatë konkursit në Bazel, pasi Izraeli, i cili u rendit i dyti, mori pjesë pavarësisht luftës në Gaza. Pas fitores, JJ (Johannes Pietsch) bëri komente kundër pjesëmarrjes së Izraelit, duke shkaktuar reagime të forta në Austri, por më vonë kërkoi falje për keqkuptimet.

Në historinë e tij, Wiener Stadthalle, hapur në vitin 1958 dhe me kapacitet 16,000 vende, ka pritur Eurovision-in më 2015 pas fitores së Conchita Wurst. Qyteti është gjithashtu i njohur për instalimin e semaforëve me çiftet homoseksuale dhe heteroseksuale, një simbol i mbështetjes për diversitetin që u bë i përhershëm pas edicionit të fundit.

Viena do të sjellë kështu një miks të muzikës moderne dhe trashëgimisë kulturore të Austrisë, duke ofruar kapacitet të madh akomodimi, lidhje të shkëlqyera transporti dhe një atmosferë cosmopolitan për edicionin e 70-të të Eurovision-it.

Top Channel