Temperaturat e larta, përfshihet nga zjarri nënstacioni i Ibës! OSSH stakon energjinë në disa zona si masë sigurie 25/07 22:40
Theo Hernandez, ende në pushime pas transferimit të tij te Al-Hilal, ka shpërndarë në Instagram një foto të tij me një fanellë kushtuar legjendës kuqezi Paolo Maldini.
Fanella mban imazhe të ndryshme të Maldinit dhe mbishkrimin “Capitano”, ndërsa postimi është bërë menjëherë viral. Në rrjetet sociale, shumë e kanë interpretuar këtë gjest si një mesazh të qartë ndaj menaxhmentit aktual të AC Milan, me të cilin Theo pati një ndarje të tensionuar.
Fotoja vjen pak ditë pasi u bë zyrtar transferimi i Theo Hernandez te Al-Hilal, i cili trajnohet nga Simone Inzaghi. Në mesazhin e tij të lamtumirës, mbrojtësi francez u shpreh hapur për zhgënjimin ndaj drejtimit të ri të klubit italian:
“Drejtimi që ka marrë klubi dhe disa vendime të fundit nuk pasqyrojnë vlerat ose ambicien që më sollën këtu. Është koha të mbyll një kapitull dhe të filloj një tjetër, të ndryshëm, por po aq të rëndësishëm për mua.”
Largimi i Paolo Maldinit nga pozicioni i drejtorit teknik në verën e vitit 2023 ishte një moment kritik për klubin dhe u shoqërua me polemika të shumta. Theo kishte një marrëdhënie të ngushtë me Maldinin, i cili luajti një rol kyç në transferimin e tij nga Real Madrid te Milan. Ky postim duket si një formë solidariteti me ish-drejtorin teknik dhe një kritikë e heshtur ndaj politikave aktuale të klubit.
Reagimet në rrjet ishin të menjëhershme. Disa tifozë e interpretuan veprimin e Theo-s si një “thirrje” nostalgjike për epokën e Maldinit dhe një reflektim të zhgënjimit të thellë që ndajnë edhe vetë ata për ndryshimet e fundit në klub.
Transferimi i Theo Hernandez te Al-Hilal është pjesë e një valë largimesh nga Milan, që përfshin edhe emra si Sandro Tonali e Franck Kessié. Këto zhvillime kanë nxitur diskutime për drejtimin e ri të klubit nën pronësinë amerikane dhe për mungesën e një vizioni të qartë sportiv, që sipas kritikëve po e largon Milanin nga identiteti i tij historik.
Top Channel
