Parku kombëtar i Lurës vazhdon të digjet nga flakët që janë të pranishme prej dy javësh.
Flakët kanë përshkuar mbi 300 hektarë pyje dhe kullota. Në operacion gjatë kësaj periudhe, kanë marrë pjesë 940 forca nga FA, zjarrfikësit e Dibrës, punonjësit e bashkisë Dibër, të zonave të mbrojtura dhe vullnetarë.
Helikopteri i Forcave te Armatosura ka ndërhyrë tre here për të fikur zjarre në Lurë.
Në ndihmë kanë ardhur dje dhe sot edhe avion nga Italia me kapacitet më të madh, i cili dje është përdorur në Zall Gjocaj ku rrezikoheshin bagëti dhe stane. Sakaq pritet që në vijim të operojë edhe në Lurë.
Po ashtu vijojnë të jenë aktive vatrat e zjarrit në Shkopet dhe Lurë.
Ndërkohë era e fortë ka favorizuar përhapjen e flakëve të cilat kanë ndezur disa vatra në malin e Shkopetit.
Zjarri përfshin parkun natyror “Ulëz-Shkopet”, ndërsa në rrezik janë edhe disa banesa në fshatin Shkopet për shkak se zjarri është afruar në një distancë të afërt.
Ekipet zjarrfikëse vijojnë përballjen në terren me flakët ndërsa pritet që në orët në vijim të ndërhyhet edhe nga ajri.
Top Channel
