Tre javë pas tragjedisë në diskotekën “Pulse” në Koçan më 16 mars 2025, ku humbën jetën 61 persona, qeveria e përbashkët e VMRO-DPMNE me VLEN dhe në hije me LSDM vazhdon ta udhëheqë diskursin publik rreth pyetjes “Kush ia dha licencën diskotekës?” – për të shmangur vëmendjen nga pyetja thelbësore: “Kush dhe në interes të kujt në Ministrinë e Brendshme e ka toleruar ‘Pulse’ për 13 vite?”
Në kuadër të hetimeve, autoritetet kanë ndërmarrë një sërë arrestimesh që përfshijnë figura të rëndësishme politike shqiptare, duke ngjallur reagime të shumta në opinionin publik dhe në skenën politike të Maqedonisë së Veriut. Në mënyrë të njëanshme, goditja e deritanishme ka rënë mbi ish-ministrat shqiptarë të Ekonomisë dhe zyrtarë të lidhur me komunitetin shqiptar, përfshirë:
• Kreshnik Bekteshi – ish-ministër i Ekonomisë (BDI), në paraburgim për 30 ditë nga Gjykata Themelore e Koçanit për dyshime mbi një licencë të falsifikuar;
• Valon Saraçini, Bekim Neziri, Driton Kuçi – ish-ministra të Ekonomisë nga BDI;
• Shaban Saliu – ministër aktual pa portofol, ish-drejtor i Drejtorisë për Mbrojtje dhe Shpëtim;
• Xhevat Selami – drejtor aktual i kësaj Drejtorie, i lidhur me koalicionin VLEN.
Ndërkohë, asnjë zyrtar i lartë i Ministrisë së Brendshme – ku policët ishin të pranishëm në “Pulse” edhe natën fatale – nuk është mbajtur përgjegjës. Rrjedhimisht, është e rëndësishme të rikujtojmë çështjet që po heshten në mënyrë sistematike tashmë tri javë në monitorimin (mediatik) të hetimit. Si për shembull, roli i Agjencisë së Sigurisë që duhet të kontrollojë numrin e të pranishmëve në objekt, përveç çështjes së licencës, apo përgjegjësinë e projektuesit të objektit dhe ata që kanë firmosur licencimin.
Nga postimet në rrjetet sociale që tregojnë për aktivitete të shumta në “Pulse”, është bërë e qartë se pothuajse nuk ka funksionar të lartë policor nga Koçani dhe Shtipi që nuk ka qenë mysafir në këtë diskotekë. Por askush nuk përgjigjet për pyetjet:
– Si ka funksionuar “Pulse”, kur kompania që e menaxhon ka llogari të bllokuar? Si janë paguar rrogat? Objekti ishte “i vulosur” – kush e hoqi vulën dhe si vijoi puna? Kjo është pyetje që përfshin edhe Drejtorinë e të Ardhurave Publike.
– Si ka ndodhur që policia e ka toleruar funksionimin e “Pulse”, përfshirë edhe natën e tragjedisë, edhe pse kishte raportime për prani të miturve dhe përdorim të piroteknikës pa operator të licencuar?
Mjaft më me farsën “Të gjithë janë fajtorë përveç Ministrisë së Brendshme”.
Anëtarë të MPB-së ishin të pranishëm në “Pulse” natën fatale. Vetë prania e të miturve dhe përdorimi i piroteknikës duhej të ishte arsye e mjaftueshme për të ndaluar koncertin – siç duhej të ndodhte në çdo event të mëparshëm të organizuar atje.
Kjo na rikthen te nevoja për të vlerësuar punën e drejtuesve lokalë të policisë. Policia duhet të ketë pasur dijeni për “vulosjen” e “Pulse” dhe mënyrën se si organizoheshin koncertet, përfshirë efektet piroteknike.
Nëse e themi qartë – policia qëllimisht nuk e ka ndaluar funksionimin e “Pulse”.
Kjo hap një sërë pyetjesh të pakëndshme:
– A dinin drejtuesit e Stacionit Policor të Koçanit apo të Drejtorisë së Punëve të Brendshme në Shtip për arsyet pse policët e tyre nuk reagonin ndaj “Pulse”? Prej vitesh?
– Nëse nuk dinin – si kanë mbërritur në ato pozita?
– Nëse dinin – në interes të kujt nuk kanë reaguar? Ishte vendim i tyre apo “urdhër nga lart”?
– Cila është përgjegjësia për emërimet e këtyre drejtuesve policorë gjatë mandateve të tre ministrave të brendshëm: Jankullovska, Spasovski dhe Toshkovski? Në interes të kujt dhe me kërkesën e kujt janë emëruar këta drejtues? Personal, partiak…?
Ndërkohë që çështjet kryesore heshten për të devijuar vëmendjen, ndarja etno-partiake është e dukshme:– Vetëm ish-zyrtarët mund të mbajnë përgjegjësi për licencimin, por jo zyrtarët aktualë?– “Pulse” funksionoi për një vit të tërë me licencë të falsifikuar – kjo nuk ndikon aspak tek ministri aktual i ekonomisë që është në detyrë prej 10 muajsh, por ndikon tek të gjithë paraardhësit e tij?–
Të gjithë ministrat shqiptarë të ekonomisë nga qeveritë e mëparshme janë fajtorë, por të gjithë ministrat maqedonas të brendshëm të të njëjtës periudhë janë të pafuqishëm?!Partia BDI ka reaguar ndaj këtyre arrestimeve, duke i cilësuar ato si një “agresion i njëanshëm dhe i padrejtë” ndaj shqiptarëve në vend. Ata kanë akuzuar institucionet shtetërore për veprime të motivuara politikisht dhe etnikisht, duke paralajmëruar masa për të parandaluar vazhdimin e këtij “sulmi” ndaj komunitetit shqiptar.
Kohëzgjatja e përballjes së synuar me shqiptarët – përmes një marrëveshjeje të heshtur mes oligarkisë së VMRO-DPMNE dhe LSDM – synon të rikthejë fokusin e opinionit publik vetëm te temat “e lejueshme” për maqedonasit.
Qëllimi është që qeveria e VLEN-VMRO-DPMNE-së, në linjë me LSDM-në, pas takimit të fundit të “lidershipit”, të veprojë në një ndarje paralele sociale si ajo që Vuçiq “paralajmëroi” në Beograd më 12 prill.Ndarja etno-partiake në Maqedoninë e Veriut duhet të polarizojë maqedonasit me shqiptarët – që të mos polarizohen maqedonasit me pushtetin e përbashkët 35-vjeçar të VMRO-DPMNE dhe LSDM. Vetëm atëherë askush nuk do të pyesë me mbështetjen e kujt e ka marrë “mafia e Frankfurtit” kontrollin e nëndheshëm dhe të ekonomisë në pjesën qendrore dhe lindore të Maqedonisë së Veriut.
Në “mungesë” shqiptarësh, Vuçiq po prodhon konflikt social në Serbi ndërmjet pansllavizmit si mbulesë për krimin partiak dhe serbizmit si koncept i shtetit të së drejtës në kombin serb. Për këtë, është e nevojshme përfshirja e Bosnje-Hercegovinës, Maqedonisë së Veriut, Kosovës dhe Malit të Zi – shtetet e paqarta të Jugosllavisë së cunguar.Qëllimi është i njëjtë – të ruhet sistemi operativ-kadrovik i “Gazimestanit”, në të cilin shërbimi ka “decentralizuar” si kriminelët, ashtu edhe biznesmenët, politikanët, gazetarët, intelektualët, akademikët… në të njëjtat pozita – në shtetet e reja pas vitit 1991.Për ilustrim: kjo është arsyeja pse televizionet tona në gjuhën maqedonase raportojnë me entuziazëm për mitingun e Vuçiqit në Beograd, por jo për protestat në Koçan të dedikuara për më shumë se 60 jetë të humbura të të rinjve – maqedonas.
Top Channel
