Kryeministri në detyrë në Kosovë, Albin Kurti ka vazhduar diskutimet për formimin e Qeverisë së re.
Si kryetar i Lëvizjes Vetëvendosje që doli e para në zgjedhjet e nëntë shkurtit ai priti në takim përfaqësuesit e partive të komuniteteve joshumicë. Të enjten, Kurti nuk mori përgjigje definitive nga Duda Balje e Unionit Social Demokrat dhe Veton Berisha nga Partia Liberale Egjiptiane. Këto parti që do të kenë nga një deputet në kuvend, paraqitën kushtet e tyre para kryeministrit në detyrë.
Albin Kurti takoi edhe partnerin e qeverisë në shkuarje, Fikrim Damkën nga Partia Demokratike Turke që në zgjedhjet e fundit siguroi dy ulëse në parlament. Sipas njoftimit Damka vetëm ka shprehur gatishmërinë për vazhdimin e bashkëpunimit. Fikrim Damka aktualisht është ministër i Zhvillimit Rajonal dhe ka aktakuzë për sulm dhe kanosje. Në kuadër të diskutimeve për formimin e qeverisë, Albin Kurti takoi edhe Albert Kinolli nga Partia e Bashkuar Rome dhe Rasim Demirin nga koalicini VAKAT që u shprehën të gatshëm për bashkëpunim. Secila prej partive kanë siguruar përfaqësimin në kuvend me nga një deputet
Të mërkurën, Albin Kurti takoi partnerët e tij të qeverisë në shkuarje. Nenad Rashiç, Emilia Rexhepi dhe Elbert Krasniqi, partitë e të cilëve kanë nga një ulëse në kuvend, konfirmuan mbështetjen për qeverinë e re. Lëvizja Vetëvendosje në zgjedhjet e nëntë shkurtit siguroi 48 ulëse në Kuvendin e Kosovës. Për të formuar qeverinë e re të udhëhequr nga Albin Kurti atij i duhen 61 vota pro, që edhe pas diskutimeve me partitë pakicë jo serbe nuk i ka.
Top Channel
